Kathāvatthu 87

Kathāvatthu

Mahāpaṇṇāsaka

Navamavagga

Rūpaṁsārammaṇantikathā

1 Rūpaṁ sārammaṇanti? Āmantā. Atthi tassa āvaṭṭanā ābhogo samannāhāro manasikāro cetanā patthanā paṇidhīti? Na hevaṁ vattabbe …pe… nanu natthi tassa āvaṭṭanā ābhogo …pe… paṇidhīti? Āmantā. Hañci natthi tassa āvaṭṭanā ābhogo …pe… paṇidhi, no ca vata re vattabbe—“rūpaṁ sārammaṇan”ti.

2 Phasso sārammaṇo, atthi tassa āvaṭṭanā ābhogo …pe… paṇidhīti? Āmantā. Rūpaṁ sārammaṇaṁ, atthi tassa āvaṭṭanā ābhogo …pe… paṇidhīti? Na hevaṁ vattabbe …pe….

3 Vedanā …pe… saññā cetanā cittaṁ saddhā vīriyaṁ sati samādhi paññā rāgo doso moho māno diṭṭhi vicikicchā thinaṁ uddhaccaṁ ahirikaṁ …pe… anottappaṁ sārammaṇaṁ, atthi tassa āvaṭṭanā ābhogo …pe… paṇidhīti? Āmantā. Rūpaṁ sārammaṇaṁ, atthi tassa āvaṭṭanā ābhogo …pe… paṇidhīti? Na hevaṁ vattabbe …pe….

4 Rūpaṁ sārammaṇaṁ, natthi tassa āvaṭṭanā ābhogo …pe… paṇidhīti? Āmantā. Phasso sārammaṇo, natthi tassa āvaṭṭanā ābhogo …pe… paṇidhīti? Na hevaṁ vattabbe …pe….

5 Rūpaṁ sārammaṇaṁ, natthi tassa āvaṭṭanā ābhogo …pe… paṇidhīti? Āmantā. Vedanā …pe… anottappaṁ sārammaṇaṁ, natthi tassa āvaṭṭanā ābhogo …pe… paṇidhīti? Na hevaṁ vattabbe …pe….

6 Na vattabbaṁ—“rūpaṁ sārammaṇan”ti? Āmantā. Nanu rūpaṁ sappaccayanti? Āmantā. Hañci rūpaṁ sappaccayaṁ, tena vata re vattabbe—“rūpaṁ sārammaṇan”ti.

Rūpaṁ sārammaṇantikathā niṭṭhitā.