Milindapañha 238

Milindapañha

Opammakathāpañha

Makkaṭakavagga

8. Māgavikaṅgapañha

1 “Bhante nāgasena, ‘māgavikassa cattāri aṅgāni gahetabbānī’ti yaṁ vadesi, katamāni tāni cattāri aṅgāni gahetabbānī”ti? “Yathā, mahārāja, māgaviko appamiddho hoti; evameva kho, mahārāja, yoginā yogāvacarena appamiddhena bhavitabbaṁ. Idaṁ, mahārāja, māgavikassa paṭhamaṁ aṅgaṁ gahetabbaṁ.

2 Puna caparaṁ, mahārāja, māgaviko migesuyeva cittaṁ upanibandhati; evameva kho, mahārāja, yoginā yogāvacarena ārammaṇesuyeva cittaṁ upanibandhitabbaṁ. Idaṁ, mahārāja, māgavikassa dutiyaṁ aṅgaṁ gahetabbaṁ.

3 Puna caparaṁ, mahārāja, māgaviko kālaṁ kammassa jānāti; evameva kho, mahārāja, yoginā yogāvacarena paṭisallānassa kālo jānitabbo ‘ayaṁ kālo paṭisallānassa, ayaṁ kālo nikkhamanāyā’ti. Idaṁ, mahārāja, māgavikassa tatiyaṁ aṅgaṁ gahetabbaṁ.

4 Puna caparaṁ, mahārāja, māgaviko migaṁ disvā hāsamabhijaneti ‘imaṁ lacchāmī’ti; evameva kho, mahārāja, yoginā yogāvacarena ārammaṇe abhiramitabbaṁ, hāsamabhijanetabbaṁ ‘uttariṁ visesamadhigacchissāmī’ti. Idaṁ, mahārāja, māgavikassa catutthaṁ aṅgaṁ gahetabbaṁ. Bhāsitampetaṁ, mahārāja, therena mogharājena—

5 ‘Ārammaṇe labhitvāna,

Pahitattena bhikkhunā;

Bhiyyo hāso janetabbo,

Adhigacchissāmi uttarin’”ti.

6 Māgavikaṅgapañho aṭṭhamo.