Milindapañha 51

Milindapañha

Nibbānavagga

10. Nibbānasukhajānanapañha

1 Rājā āha—“bhante nāgasena, yo na labhati nibbānaṁ, jānāti so ‘sukhaṁ nibbānan’”ti? “Āma, mahārāja, yo na labhati nibbānaṁ, jānāti so ‘sukhaṁ nibbānan’”ti. “Kathaṁ, bhante nāgasena, alabhanto jānāti ‘sukhaṁ nibbānan’”ti? “Taṁ kiṁ maññasi, mahārāja, yesaṁ nacchinnā hatthapādā, jāneyyuṁ te, mahārāja, ‘dukkhaṁ hatthapādacchedanan’”ti? “Āma, bhante, jāneyyun”ti. “Kathaṁ jāneyyun”ti? “Aññesaṁ, bhante, chinnahatthapādānaṁ paridevitasaddaṁ sutvā jānanti ‘dukkhaṁ hatthapādacchedanan’”ti. “Evameva kho, mahārāja, yesaṁ diṭṭhaṁ nibbānaṁ, tesaṁ saddaṁ sutvā jānāti ‘sukhaṁ nibbānan’”ti.

2 “Kallosi, bhante nāgasenā”ti.

3 Nibbānasukhajānanapañho dasamo.

4 Nibbānavaggo catuttho.

5 Imasmiṁ vagge dasa pañhā.