Therāpadāna 25

Therāpadāna

Subhūtivagga

3 Tisaraṇagamaniyattheraapadāna

1 “Nagare candavatiyā,

mātuupaṭṭhāko ahuṁ;

Andhā mātā pitā mayhaṁ,

te posemi ahaṁ tadā.

2 Rahogato nisīditvā,

evaṁ cintesahaṁ tadā;

Posento mātāpitaro,

pabbajjaṁ na labhāmahaṁ.

3 Mahandhakārapihitā,

tividhaggīhi ḍayhare;

Etādise bhave jāte,

natthi koci vināyako.

4 Buddho loke samuppanno,

dippati dāni sāsanaṁ;

Sakkā uddharituṁ attā,

puññakāmena jantunā.

5 Uggayha tīṇi saraṇe,

paripuṇṇāni gopayiṁ;

Tena kammena sukatena,

paṭimokkhāmi duggatiṁ.

6 Nisabho nāma samaṇo,

buddhassa aggasāvako;

Tamahaṁ upagantvāna,

saraṇagamanaṁ gahiṁ.

7 Vassasatasahassāni,

āyu vijjati tāvade;

Tāvatā saraṇagamanaṁ,

paripuṇṇaṁ agopayiṁ.

8 Carime vattamānamhi,

saraṇaṁ taṁ anussariṁ;

Tena kammena sukatena,

tāvatiṁsaṁ agacchahaṁ.

9 Devalokagato santo,

puññakammasamāhito;

Yaṁ desaṁ upapajjāmi,

aṭṭha hetū labhāmahaṁ.

10 Disāsu pūjito homi,

tikkhapañño bhavāmahaṁ;

Sabbe devānuvattanti,

amitabhogaṁ labhāmahaṁ.

11 Suvaṇṇavaṇṇo sabbattha,

paṭikanto bhavāmahaṁ;

Mittānaṁ acalo homi,

yaso abbhuggato mamaṁ.

12 Asītikkhattu devindo,

devarajjamakārayiṁ;

Dibbasukhaṁ anubhaviṁ,

accharāhi purakkhato.

13 Pañcasattatikkhattuñca,

cakkavattī ahosahaṁ;

Padesarajjaṁ vipulaṁ,

gaṇanāto asaṅkhiyaṁ.

14 Pacchime bhave sampatte,

puññakammasamāhito;

Pure sāvatthiyaṁ jāto,

mahāsāle suaḍḍhake.

15 Nagarā nikkhamitvāna,

dārakehi purakkhato;

Hasakhiḍḍasamaṅgīhaṁ,

saṅghārāmaṁ upāgamiṁ.

16 Tatthaddasāsiṁ samaṇaṁ,

vippamuttaṁ nirūpadhiṁ;

So me dhammamadesesi,

saraṇañca adāsi me.

17 Sohaṁ sutvāna saraṇaṁ,

saraṇaṁ me anussariṁ;

Ekāsane nisīditvā,

arahattamapāpuṇiṁ.

18 Jātiyā sattame vasse,

arahattamapāpuṇiṁ;

Upasampādayi buddho,

guṇamaññāya cakkhumā.

19 Aparimeyye ito kappe,

saraṇāni agacchahaṁ;

Tato me sukataṁ kammaṁ,

phalaṁ dassesi me idha.

20 Sugopitaṁ me saraṇaṁ,

mānasaṁ suppaṇīhitaṁ;

Anubhotvā yasaṁ sabbaṁ,

pattomhi acalaṁ padaṁ.

21 Yesaṁ sotāvadhānatthi,

suṇotha mama bhāsato;

Ahaṁ vo kathayissāmi,

sāmaṁ diṭṭhaṁ padaṁ mama.

22 ‘Buddho loke samuppanno,

vattate jinasāsanaṁ;

Amatā vāditā bherī,

sokasallavinodanā.

23 Yathāsakena thāmena,

puññakkhette anuttare;

Adhikāraṁ kareyyātha,

passayissatha nibbutiṁ.

24 Paggayha tīṇi saraṇe,

pañcasīlāni gopiya;

Buddhe cittaṁ pasādetvā,

dukkhassantaṁ karissatha.

25 Sammā dhammaṁ bhāvetvāna,

Sīlāni parigopiya;

Aciraṁ arahattaṁ vo,

Sabbepi pāpuṇissatha.

26 Tevijjo iddhipattomhi,

cetopariyakovido;

Sāvako te mahāvīra,

saraṇo vandati satthuno’.

27 Aparimeyye ito kappe,

saraṇaṁ buddhassa gacchahaṁ;

Duggatiṁ nābhijānāmi,

saraṇaṁ gamane phalaṁ.

28 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

29 Itthaṁ sudaṁ āyasmā tisaraṇagamaniyo thero imā gāthāyo abhāsitthāti.

30 Tisaraṇagamaniyattherassāpadānaṁ tatiyaṁ.