Therāpadāna 12

Therāpadāna

Buddhavagga

Ānandattheraapadāna

1 “Ārāmadvārā nikkhamma,

padumuttaro mahāmuni;

Vassento amataṁ vuṭṭhiṁ,

nibbāpesi mahājanaṁ.

2 Satasahassaṁ te dhīrā,

chaḷabhiññā mahiddhikā;

Parivārenti sambuddhaṁ,

chāyāva anapāyinī.

3 Hatthikkhandhagato āsiṁ,

setacchattaṁ varuttamaṁ;

Sucārurūpaṁ disvāna,

vitti me udapajjatha.

4 Oruyha hatthikhandhamhā,

upagacchiṁ narāsabhaṁ;

Ratanāmayachattaṁ me,

buddhaseṭṭhassa dhārayiṁ.

5 Mama saṅkappamaññāya,

padumuttaro mahāisi;

Taṁ kathaṁ ṭhapayitvāna,

imā gāthā abhāsatha.

6 ‘Yo so chattamadhāresi,

soṇṇālaṅkārabhūsitaṁ;

Tamahaṁ kittayissāmi,

suṇotha mama bhāsato.

7 Ito gantvā ayaṁ poso,

tusitaṁ āvasissati;

Anubhossati sampattiṁ,

accharāhi purakkhato.

8 Catuttiṁsatikkhattuñca,

devarajjaṁ karissati;

Balādhipo aṭṭhasataṁ,

vasudhaṁ āvasissati.

9 Aṭṭhapaññāsakkhattuñca,

cakkavattī bhavissati;

Padesarajjaṁ vipulaṁ,

mahiyā kārayissati.

10 Kappasatasahassamhi,

okkākakulasambhavo;

Gotamo nāma gottena,

satthā loke bhavissati.

11 Sakyānaṁ kulaketussa,

ñātibandhu bhavissati;

Ānando nāma nāmena,

upaṭṭhāko mahesino.

12 Ātāpī nipako cāpi,

bāhusacce sukovido;

Nivātavutti atthaddho,

sabbapāṭhī bhavissati.

13 Padhānapahitatto so,

upasanto nirūpadhi;

Sabbāsave pariññāya,

nibbāyissatināsavo.

14 Santi āraññakā nāgā,

kuñjarā saṭṭhihāyanā;

Tidhāpabhinnā mātaṅgā,

īsādantā urūḷhavā.

15 Anekasatasahassā,

paṇḍitāpi mahiddhikā;

Sabbe te buddhanāgassa,

na hontupaṇidhimhi te’.

16 Ādiyāme namassāmi,

majjhime atha pacchime;

Pasannacitto sumano,

buddhaseṭṭhaṁ upaṭṭhahiṁ.

17 Ātāpī nipako cāpi,

sampajāno patissato;

Sotāpattiphalaṁ patto,

sekhabhūmīsu kovido.

18 Satasahassito kappe,

yaṁ kammamabhinīhariṁ;

Tāhaṁ bhūmimanuppatto,

ṭhitā saddhammamācalā.

19 Svāgataṁ vata me āsi,

buddhaseṭṭhassa santike;

Tisso vijjā anuppattā,

kataṁ buddhassa sāsanaṁ.

20 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

21 Itthaṁ sudaṁ āyasmā ānando thero imā gāthāyo abhāsitthāti.

22 Ānandattherassāpadānaṁ dasamaṁ.

23 Tassuddānaṁ

24 Buddho paccekabuddho ca,

sāriputto ca kolito;

Kassapo anuruddho ca,

puṇṇatthero upāli ca.

25 Aññāsikoṇḍañño piṇḍolo,

revatānandapaṇḍito;

Chasatāni ca paññāsa,

gāthāyo sabbapiṇḍitā.

26 Apadāne buddhavaggo paṭhamo.