Therāpadāna 154

Therāpadāna

Bandhujīvakavagga

Tambapupphiyattheraapadāna

1 “Parakammāyane yutto,

aparādhaṁ akāsahaṁ;

Vanantaṁ abhidhāvissaṁ,

bhayaverasamappito.

2 Pupphitaṁ pādapaṁ disvā,

piṇḍibandhaṁ sunimmitaṁ;

Tambapupphaṁ gahetvāna,

bodhiyaṁ okiriṁ ahaṁ.

3 Sammajjitvāna taṁ bodhiṁ,

pāṭaliṁ pādaputtamaṁ;

Pallaṅkaṁ ābhujitvāna,

bodhimūle upāvisiṁ.

4 Gatamaggaṁ gavesantā,

āgacchuṁ mama santikaṁ;

Te ca disvānahaṁ tattha,

āvajjiṁ bodhimuttamaṁ.

5 Vanditvāna ahaṁ bodhiṁ,

vippasannena cetasā;

Anekatāle papatiṁ,

giridugge bhayānake.

6 Ekanavutito kappe,

yaṁ pupphamabhiropayiṁ;

Duggatiṁ nābhijānāmi,

bodhipūjāyidaṁ phalaṁ.

7 Ito ca tatiye kappe,

rājā susaññato ahaṁ;

Sattaratanasampanno,

cakkavattī mahabbalo.

8 Paṭisambhidā catasso,

…pe…

kataṁ buddhassa sāsanaṁ”.

9 Itthaṁ sudaṁ āyasmā tambapupphiyo thero imā gāthāyo abhāsitthāti.

10 Tambapupphiyattherassāpadānaṁ dutiyaṁ.