Therāpadāna 553

Therāpadāna

Yasavagga

Yasattheraapadāna

1 “Mahāsamuddaṁ oggayha,

bhavanaṁ me sunimmitaṁ;

Sunimmitā pokkharaṇī,

cakkavākūpakūjitā.

2 Mandārakehi sañchannā,

padumuppalakehi ca;

Nadī ca sandate tattha,

supatitthā manoramā.

3 Macchakacchapasañchannā,

nānādijasamotthaṭā;

Mayūrakoñcābhirudā,

kokilādīhi vagguhi.

4 Pārevatā ravihaṁsā,

cakkavākā nadīcarā;

Tittirā sālikā cettha,

pāvakā jīvaṁjīvakā.

5 Haṁsākoñcābhinaditā,

kosiyā piṅgalā bahū;

Sattaratanasampannā,

maṇimuttapavāḷikā.

6 Sabbe soṇṇamayā rukkhā,

nānākhandhasameritā;

Ujjotenti divārattiṁ,

bhavanaṁ sabbakālikaṁ.

7 Saṭṭhituriyasahassāni,

sāyaṁ pāto pavajjare;

Soḷasitthisahassāni,

parivārenti maṁ sadā.

8 Abhinikkhamma bhavanā,

sumedhaṁ lokanāyakaṁ;

Pasannacitto sumano,

vandayiṁ taṁ mahāyasaṁ.

9 Sambuddhaṁ abhivādetvā,

sasaṅghaṁ taṁ nimantayiṁ;

Adhivāsesi so dhīro,

sumedho lokanāyako.

10 Mama dhammakathaṁ katvā,

uyyojesi mahāmuni;

Sambuddhaṁ abhivādetvā,

bhavanaṁ me upāgamiṁ.

11 Āmantayiṁ parijanaṁ,

sabbe sannipatuṁ tadā;

‘Pubbaṇhasamayaṁ buddho,

bhavanaṁ āgamissati.

12 Lābhā amhaṁ suladdhā no,

ye vasāma tavantike;

Mayampi buddhaseṭṭhassa,

pūjayissāma satthuno’.

13 Annaṁ pānaṁ paṭṭhapetvā,

kālaṁ ārocayiṁ ahaṁ;

Vasīsatasahassehi,

upesi lokanāyako.

14 Pañcaṅgikehi turiyehi,

paccuggamamakāsahaṁ;

Sabbasoṇṇamaye pīṭhe,

nisīdi purisuttamo.

15 Uparicchadanaṁ āsi,

sabbasoṇṇamayaṁ tadā;

Bījanīyo pavāyanti,

bhikkhusaṅghaṁ anuttaraṁ.

16 Pahūtenannapānena,

bhikkhusaṅghaṁ atappayiṁ;

Paccekadussayugale,

bhikkhusaṅghassadāsahaṁ.

17 Yaṁ vadeti sumedho so,

āhutīnaṁ paṭiggaho;

Bhikkhusaṅghe nisīditvā,

imā gāthā abhāsatha.

18 ‘Yo maṁ annena pānena,

sabbe ime ca tappayi;

Tamahaṁ kittayissāmi,

suṇātha mama bhāsato.

19 Aṭṭhārase kappasate,

devaloke ramissati;

Sahassakkhattuṁ rājāyaṁ,

cakkavattī bhavissati.

20 Upagacchati yaṁ yoniṁ,

devattaṁ atha mānusaṁ;

Sabbasoṇṇamayaṁ tassa,

chadanaṁ dhārayissati.

21 Tiṁsakappasahassamhi,

okkākakulasambhavo;

Gotamo nāma gottena,

satthā loke bhavissati.

22 Tassa dhammesu dāyādo,

oraso dhammanimmito;

Sabbāsave pariññāya,

nibbāyissatināsavo.

23 Bhikkhusaṅghe nisīditvā,

sīhanādaṁ nadissati;

Citake chattaṁ dhārenti,

heṭṭhā chattamhi ḍayhatha’.

24 Sāmaññaṁ me anuppattaṁ,

kilesā jhāpitā mayā;

Maṇḍape rukkhamūle vā,

santāso me na vijjati.

25 Tiṁsakappasahassamhi,

yaṁ dānamadadiṁ tadā;

Duggatiṁ nābhijānāmi,

sabbadānassidaṁ phalaṁ.

26 Kilesā jhāpitā mayhaṁ,

bhavā sabbe samūhatā;

Nāgova bandhanaṁ chetvā,

viharāmi anāsavo.

27 Svāgataṁ vata me āsi,

mama buddhassa santike;

Tisso vijjā anuppattā,

kataṁ buddhassa sāsanaṁ.

28 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

29 Itthaṁ sudaṁ āyasmā yaso thero imā gāthāyo abhāsitthāti.

30 Yasattherassāpadānaṁ paṭhamaṁ.