Therāpadāna 347

Therāpadāna

Ekapadumiyavagga

Naḷāgārikattheraapadāna

1 “Himavantassāvidūre,

hārito nāma pabbato;

Sayambhū nārado nāma,

rukkhamūle vasī tadā.

2 Naḷāgāraṁ karitvāna,

tiṇena chādayiṁ ahaṁ;

Caṅkamaṁ sodhayitvāna,

sayambhussa adāsahaṁ.

3 Catuddasasu kappesu,

devaloke ramiṁ ahaṁ;

Catusattatikkhattuñca,

devarajjaṁ akārayiṁ.

4 Catusattatikkhattuñca,

cakkavattī ahosahaṁ;

Padesarajjaṁ vipulaṁ,

gaṇanāto asaṅkhiyaṁ.

5 Ubbiddhaṁ bhavanaṁ mayhaṁ,

Indalaṭṭhīva uggataṁ;

Sahassathambhaṁ atulaṁ,

Vimānaṁ sapabhassaraṁ.

6 Dve sampattī anubhotvā,

sukkamūlena codito;

Gotamassa bhagavato,

sāsane pabbajiṁ ahaṁ.

7 Padhānapahitattomhi,

upasanto nirūpadhi;

Nāgova bandhanaṁ chetvā,

viharāmi anāsavo.

8 Paṭisambhidā catasso,

…pe…

kataṁ buddhassa sāsanaṁ”.

9 Itthaṁ sudaṁ āyasmā naḷāgāriko thero imā gāthāyo abhāsitthāti.

10 Naḷāgārikattherassāpadānaṁ pañcamaṁ.