Therāpadāna 428

Therāpadāna

Sakiṁsammajjakavagga

1 “Sucintitaṁ bhagavantaṁ,

lokajeṭṭhaṁ narāsabhaṁ;

Upaviṭṭhaṁ mahāraññaṁ,

vātābādhena pīḷitaṁ.

2 Disvā cittaṁ pasādetvā,

ghatamaṇḍamupānayiṁ;

Katattā ācitattā ca,

gaṅgā bhāgīrathī ayaṁ.

3 Mahāsamuddā cattāro,

ghataṁ sampajjare mama;

Ayañca pathavī ghorā,

appamāṇā asaṅkhiyā.

4 Mama saṅkappamaññāya,

bhavate madhusakkarā;

Cātuddīpā ime rukkhā,

pādapā dharaṇīruhā.

5 Mama saṅkappamaññāya,

kapparukkhā bhavanti te;

Paññāsakkhattuṁ devindo,

devarajjamakārayiṁ.

6 Ekapaññāsakkhattuñca,

cakkavattī ahosahaṁ;

Padesarajjaṁ vipulaṁ,

gaṇanāto asaṅkhiyaṁ.

7 Catunnavutito kappe,

yaṁ dānamadadiṁ tadā;

Duggatiṁ nābhijānāmi,

ghatamaṇḍassidaṁ phalaṁ.

8 Kilesā jhāpitā mayhaṁ,

…pe…

viharāmi anāsavo.

9 Svāgataṁ vata me āsi,

…pe…

kataṁ buddhassa sāsanaṁ.

10 Paṭisambhidā catasso,

…pe…

kataṁ buddhassa sāsanaṁ”.

11 Itthaṁ sudaṁ āyasmā ghatamaṇḍadāyako thero imā gāthāyo abhāsitthāti.

12 Ghatamaṇḍadāyakattherassāpadānaṁ chaṭṭhaṁ.