Therāpadāna 43

翻訳を変更

Therāpadāna

Upālivagga

1 Bhāgineyyupālittheraapadāna

1 “Khīṇāsavasahassehi,

parivuto lokanāyako;

Vivekamanuyutto so,

gacchate paṭisallituṁ.

2 Ajinena nivatthohaṁ,

tidaṇḍaparidhārako;

Bhikkhusaṅghaparibyūḷhaṁ,

addasaṁ lokanāyakaṁ.

3 Ekaṁsaṁ ajinaṁ katvā,

sire katvāna añjaliṁ;

Sambuddhaṁ abhivādetvā,

santhaviṁ lokanāyakaṁ.

4 Yathāṇḍajā ca saṁsedā,

opapātī jalābujā;

Kākādipakkhino sabbe,

antalikkhacarā sadā.

5 ‘Ye keci pāṇabhūtatthi,

saññino vā asaññino;

Sabbe te tava ñāṇamhi,

anto honti samogadhā.

6 Gandhā ca pabbateyyā ye,

himavantanaguttame;

Sabbe te tava sīlamhi,

kalāyapi na yujjare.

7 Mohandhakārapakkhando,

ayaṁ loko sadevako;

Tava ñāṇamhi jotante,

andhakārā vidhaṁsitā.

8 Yathā atthaṅgate sūriye,

honti sattā tamogatā;

Evaṁ buddhe anuppanne,

hoti loko tamogato.

9 Yathodayanto ādicco,

vinodeti tamaṁ sadā;

Tatheva tvaṁ buddhaseṭṭha,

viddhaṁsesi tamaṁ sadā.

10 Padhānapahitattosi,

buddho loke sadevake;

Tava kammābhiraddhena,

tosesi janataṁ bahuṁ’.

11 Taṁ sabbaṁ anumoditvā,

padumuttaro mahāmuni;

Nabhaṁ abbhuggamī dhīro,

haṁsarājāva ambare.

12 Abbhuggantvāna sambuddho,

mahesi padumuttaro;

Antalikkhe ṭhito satthā,

imā gāthā abhāsatha.

13 Yenidaṁ thavitaṁ ñāṇaṁ,

opammehi samāyutaṁ;

Tamahaṁ kittayissāmi,

suṇātha mama bhāsato.

14 ‘Aṭṭhārasañca khattuṁ so,

devarājā bhavissati;

Pathabyā rajjaṁ tisataṁ,

vasudhaṁ āvasissati.

15 Pañcavīsatikkhattuñca,

cakkavattī bhavissati;

Padesarajjaṁ vipulaṁ,

gaṇanāto asaṅkhiyaṁ.

16 Kappasatasahassamhi,

okkākakulasambhavo;

Gotamo nāma gottena,

satthā loke bhavissati.

17 Tusitā hi cavitvāna,

sukkamūlena codito;

Hīnova jātiyā santo,

upāli nāma hessati.

18 So pacchā pabbajitvāna,

virājetvāna pāpakaṁ;

Sabbāsave pariññāya,

nibbāyissatināsavo.

19 Tuṭṭho ca gotamo buddho,

sakyaputto mahāyaso;

Vinayādhigataṁ tassa,

etadagge ṭhapessati’.

20 Saddhāyāhaṁ pabbajito,

katakicco anāsavo;

Sabbāsave pariññāya,

viharāmi anāsavo.

21 Bhagavā cānukampī maṁ,

vinayehaṁ visārado;

Sakakammābhiraddho ca,

viharāmi anāsavo.

22 Saṁvuto pātimokkhamhi,

indriyesu ca pañcasu;

Dhāremi vinayaṁ sabbaṁ,

kevalaṁ ratanākaraṁ.

23 Mamañca guṇamaññāya,

satthā loke anuttaro;

Bhikkhusaṅghe nisīditvā,

etadagge ṭhapesi maṁ.

24 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

25 Itthaṁ sudaṁ āyasmā upāli thero imā gāthāyo abhāsitthāti.

26 Bhāgineyyupālittherassāpadānaṁ paṭhamaṁ.