Buddhavaṁsa 9

Buddhavaṁsa

9 Anomadassībuddhavaṁsa

1 “Sobhitassa aparena,

Sambuddho dvipaduttamo;

Anomadassī amitayaso,

Tejassī duratikkamo.

2 So chetvā bandhanaṁ sabbaṁ,

viddhaṁsetvā tayo bhave;

Anivattigamanaṁ maggaṁ,

desesi devamānuse.

3 Sāgarova asaṅkhobbho,

pabbatova durāsado;

Ākāsova ananto so,

sālarājāva phullito.

4 Dassanenapi taṁ buddhaṁ,

tositā honti pāṇino;

Byāharantaṁ giraṁ sutvā,

amataṁ pāpuṇanti te.

5 Dhammābhisamayo tassa,

Iddho phīto tadā ahu;

Koṭisatāni abhisamiṁsu,

Paṭhame dhammadesane.

6 Tato paraṁ abhisamaye,

Vassante dhammavuṭṭhiyo;

Asītikoṭiyobhisamiṁsu,

Dutiye dhammadesane.

7 Tatoparañhi vassante,

tappayante ca pāṇinaṁ;

Aṭṭhasattatikoṭīnaṁ,

tatiyābhisamayo ahu.

8 Sannipātā tayo āsuṁ,

tassāpi ca mahesino;

Abhiññābalappattānaṁ,

pupphitānaṁ vimuttiyā.

9 Aṭṭhasatasahassānaṁ,

sannipāto tadā ahu;

Pahīnamadamohānaṁ,

santacittāna tādinaṁ.

10 Sattasatasahassānaṁ,

dutiyo āsi samāgamo;

Anaṅgaṇānaṁ virajānaṁ,

upasantāna tādinaṁ.

11 Channaṁ satasahassānaṁ,

tatiyo āsi samāgamo;

Abhiññābalappattānaṁ,

nibbutānaṁ tapassinaṁ.

12 Ahaṁ tena samayena,

yakkho āsiṁ mahiddhiko;

Nekānaṁ yakkhakoṭīnaṁ,

vasavattimhi issaro.

13 Tadāpi taṁ buddhavaraṁ,

upagantvā mahesinaṁ;

Annapānena tappesiṁ,

sasaṅghaṁ lokanāyakaṁ.

14 Sopi maṁ tadā byākāsi,

visuddhanayano muni;

‘Aparimeyyito kappe,

ayaṁ buddho bhavissati.

15 Padhānaṁ padahitvāna,

…pe…

hessāma sammukhā imaṁ’.

16 Tassāpi vacanaṁ sutvā,

haṭṭho saṁviggamānaso;

Uttariṁ vatamadhiṭṭhāsiṁ,

dasapāramipūriyā.

17 Nagaraṁ candavatī nāma,

yasavā nāma khattiyo;

Mātā yasodharā nāma,

anomadassissa satthuno.

18 Dasavassasahassāni,

agāraṁ ajjha so vasi;

Sirī upasirī vaḍḍho,

tayo pāsādamuttamā.

19 Tevīsatisahassāni,

nāriyo samalaṅkatā;

Sirimā nāma sā nārī,

upavāṇo nāma atrajo.

20 Nimitte caturo disvā,

sivikāyābhinikkhami;

Anūnadasamāsāni,

padhānaṁ padahī jino.

21 Brahmunā yācito santo,

anomadassī mahāmuni;

Vatti cakkaṁ mahāvīro,

uyyāne so sudassane.

22 Nisabho ca anomo ca,

ahesuṁ aggasāvakā;

Varuṇo nāmupaṭṭhāko,

anomadassissa satthuno.

23 Sundarī ca sumanā ca,

ahesuṁ aggasāvikā;

Bodhi tassa bhagavato,

ajjunoti pavuccati.

24 Nandivaḍḍho sirivaḍḍho,

ahesuṁ aggupaṭṭhakā;

Uppalā ceva padumā ca,

ahesuṁ aggupaṭṭhikā.

25 Aṭṭhapaṇṇāsaratanaṁ,

accuggato mahāmuni;

Pabhā niddhāvatī tassa,

sataraṁsīva uggato.

26 Vassasatasahassāni,

āyu vijjati tāvade;

Tāvatā tiṭṭhamāno so,

tāresi janataṁ bahuṁ.

27 Supupphitaṁ pāvacanaṁ,

arahantehi tādihi;

Vītarāgehi vimalehi,

sobhittha jinasāsanaṁ.

28 So ca satthā amitayaso,

Yugāni tāni atuliyāni;

Sabbaṁ tamantarahitaṁ,

Nanu rittā sabbasaṅkhārā.

29 Anomadassī jino satthā,

Dhammārāmamhi nibbuto;

Tatthevassa jinathūpo,

Ubbedho pañcavīsatī”ti.

30 Anomadassissa bhagavato vaṁso sattamo.