Milindapañha 226

Milindapañha

Opammakathāpañha

Sīhavagga

6. Satapattaṅgapañha

1 “Bhante nāgasena, ‘satapattassa ekaṁ aṅgaṁ gahetabban’ti yaṁ vadesi, katamaṁ taṁ ekaṁ aṅgaṁ gahetabban”ti? “Yathā, mahārāja, satapatto ravitvā paresaṁ khemaṁ vā bhayaṁ vā ācikkhati; evameva kho, mahārāja, yoginā yogāvacarena paresaṁ dhammaṁ desayamānena vinipātaṁ bhayato dassayitabbaṁ, nibbānaṁ khemato dassayitabbaṁ. Idaṁ, mahārāja, satapattassa ekaṁ aṅgaṁ gahetabbaṁ. Bhāsitampetaṁ, mahārāja, therena piṇḍolabhāradvājena—

2 ‘Niraye bhayasantāsaṁ,

nibbāne vipulaṁ sukhaṁ;

Ubhayānetānatthāni,

dassetabbāni yoginā’”ti.

3 Satapattaṅgapañho chaṭṭho.