Kathāvatthu 57

Kathāvatthu

Mahāpaṇṇāsaka

Chaṭṭhavagga

Āruppakathā

1 Ākāsānañcāyatanaṁ asaṅkhatanti? Āmantā. Nibbānaṁ tāṇaṁ leṇaṁ saraṇaṁ parāyanaṁ accutaṁ amatanti? Na hevaṁ vattabbe …pe… ākāsānañcāyatanaṁ asaṅkhataṁ, nibbānaṁ asaṅkhatanti? Āmantā. Dve asaṅkhatānīti? Na hevaṁ vattabbe …pe… dve asaṅkhatānīti? Āmantā. Dve tāṇāni …pe… antarikā vāti? Na hevaṁ vattabbe …pe….

2 Ākāsānañcāyatanaṁ asaṅkhatanti? Āmantā. Ākāsānañcāyatanaṁ bhavo gati sattāvāso saṁsāro yoni viññāṇaṭṭhiti attabhāvapaṭilābhoti? Āmantā. Asaṅkhataṁ bhavo gati sattāvāso saṁsāro yoni viññāṇaṭṭhiti attabhāvapaṭilābhoti? Na hevaṁ vattabbe …pe….

3 Atthi ākāsānañcāyatanūpagaṁ kammanti? Āmantā. Atthi asaṅkhatūpagaṁ kammanti? Na hevaṁ vattabbe …pe… atthi ākāsānañcāyatanūpagā sattāti? Āmantā. Atthi asaṅkhatūpagā sattāti? Na hevaṁ vattabbe …pe….

4 Ākāsānañcāyatane sattā jāyanti jīyanti mīyanti cavanti upapajjantīti? Āmantā. Asaṅkhate sattā jāyanti jīyanti mīyanti cavanti upapajjantīti? Na hevaṁ vattabbe …pe… ākāsānañcāyatane atthi vedanā saññā saṅkhārā viññāṇanti? Āmantā. Asaṅkhate atthi vedanā saññā saṅkhārā viññāṇanti? Na hevaṁ vattabbe …pe… ākāsānañcāyatanaṁ catuvokārabhavoti? Āmantā. Asaṅkhataṁ catuvokārabhavoti? Na hevaṁ vattabbe …pe….

5 Na vattabbaṁ—“cattāro āruppā asaṅkhatā”ti? Āmantā. Nanu cattāro āruppā anejā vuttā bhagavatāti? Āmantā. Hañci cattāro āruppā anejā vuttā bhagavatā, tena vata re vattabbe—“cattāro āruppā asaṅkhatā”ti.

Āruppakathā niṭṭhitā.