Therāpadāna 323

Therāpadāna

Umāpupphiyavagga

1 “Samāhitaṁ samāpannaṁ,

siddhatthamaparājitaṁ;

Samādhinā upaviṭṭhaṁ,

addasāhaṁ naruttamaṁ.

2 Umāpupphaṁ gahetvāna,

buddhassa abhiropayiṁ;

Sabbapupphā ekasīsā,

uddhaṁvaṇṭā adhomukhā.

3 Sucittā viya tiṭṭhante,

ākāse pupphasantharā;

Tena cittappasādena,

tusitaṁ upapajjahaṁ.

4 Catunnavutito kappe,

yaṁ pupphamabhipūjayiṁ;

Duggatiṁ nābhijānāmi,

buddhapūjāyidaṁ phalaṁ.

5 Pañcapaññāsito kappe,

eko āsiṁ mahīpati;

Samantachadano nāma,

cakkavattī mahabbalo.

6 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

7 Itthaṁ sudaṁ āyasmā umāpupphiyo thero imā gāthāyo abhāsitthāti.

8 Umāpupphiyattherassāpadānaṁ paṭhamaṁ.