Therāpadāna 332

Therāpadāna

Umāpupphiyavagga

Saparivārachattadāyakattheraapadāna

1 “Padumuttaro lokavidū,

āhutīnaṁ paṭiggaho;

Ākāse jalavuṭṭhīva,

vassate dhammavuṭṭhiyā.

2 Tamaddasāsiṁ sambuddhaṁ,

desentaṁ amataṁ padaṁ;

Sakaṁ cittaṁ pasādetvā,

agamāsiṁ sakaṁ gharaṁ.

3 Chattaṁ alaṅkataṁ gayha,

upagacchiṁ naruttamaṁ;

Haṭṭho haṭṭhena cittena,

ākāse ukkhipiṁ ahaṁ.

4 Susaṅgahitayānaṁva,

dantova sāvakuttamo;

Upagantvāna sambuddhaṁ,

matthake sampatiṭṭhahi.

5 Anukampako kāruṇiko,

buddho lokagganāyako;

Bhikkhusaṅghe nisīditvā,

imā gāthā abhāsatha.

6 ‘Yena chattamidaṁ dinnaṁ,

alaṅkataṁ manoramaṁ;

Tena cittappasādena,

duggatiṁ so na gacchati.

7 Sattakkhattuñca devesu,

devarajjaṁ karissati;

Bāttiṁsakkhattuñca rājā,

cakkavattī bhavissati.

8 Kappasatasahassamhi,

okkākakulasambhavo;

Gotamo nāma gottena,

satthā loke bhavissati.

9 Tassa dhammesu dāyādo,

oraso dhammanimmito;

Sabbāsave pariññāya,

nibbāyissatināsavo’.

10 Buddhassa giramaññāya,

vācāsabhimudīritaṁ;

Pasannacitto sumano,

bhiyyo hāsaṁ janesahaṁ.

11 Jahitvā mānusaṁ yoniṁ,

Dibbaṁ yoniṁ samajjhagaṁ;

Vimānamuttamaṁ mayhaṁ,

Abbhuggataṁ manoramaṁ.

12 Vimānā nikkhamantassa,

setacchattaṁ dharīyati;

Tadā saññaṁ paṭilabhiṁ,

pubbakammassidaṁ phalaṁ.

13 Devalokā cavitvāna,

manussattañca āgamiṁ;

Chattiṁsakkhattuṁ cakkavattī,

sattakappasatamhito.

14 Tamhā kāyā cavitvāna,

āgacchiṁ tidasaṁ puraṁ;

Saṁsaritvānupubbena,

mānusaṁ punarāgamiṁ.

15 Okkantaṁ mātukucchiṁ maṁ,

setacchattaṁ adhārayuṁ;

Jātiyā sattavassohaṁ,

pabbajiṁ anagāriyaṁ.

16 Sunando nāma nāmena,

brāhmaṇo mantapāragū;

Phalikaṁ chattamādāya,

sāvakaggassa so tadā.

17 Anumodi mahāvīro,

sāriputto mahākathī;

Sutvānumodanaṁ tassa,

pubbakammamanussariṁ.

18 Añjaliṁ paggahetvāna,

sakaṁ cittaṁ pasādayiṁ;

Saritvā purimaṁ kammaṁ,

arahattamapāpuṇiṁ.

19 Uṭṭhāya āsanā tamhā,

sire katvāna añjaliṁ;

Sambuddhaṁ abhivādetvā,

imaṁ vācaṁ udīrayiṁ.

20 Satasahassito kappe,

buddho loke anuttaro;

Padumuttaro lokavidū,

āhutīnaṁ paṭiggaho.

21 Tassa chattaṁ mayā dinnaṁ,

vicittaṁ samalaṅkataṁ;

Ubho hatthehi paggaṇhi,

sayambhū aggapuggalo.

22 Aho buddhā aho dhammā,

aho no satthusampadā;

Ekacchattassa dānena,

duggatiṁ nupapajjahaṁ.

23 Kilesā jhāpitā mayhaṁ,

bhavā sabbe samūhatā;

Sabbāsave pariññāya,

viharāmi anāsavo.

24 Paṭisambhidā catasso,

…pe…

kataṁ buddhassa sāsanaṁ”.

25 Itthaṁ sudaṁ āyasmā saparivārachattadāyako thero imā gāthāyo abhāsitthāti.

26 Saparivārachattadāyakattherassāpadānaṁ dasamaṁ.

27 Umāpupphiyavaggo tettiṁsatimo.

28 Tassuddānaṁ

29 Umāpupphañca pulinaṁ,

hāso yañño nimittako;

Saṁsāvako nigguṇḍī ca,

sumanaṁ pupphachattako;

Saparivārachatto ca,

gāthā sattasatuttarāti.