Therāpadāna 342

Therāpadāna

Gandhodakavagga

Ukkhittapadumiyattheraapadāna

1 “Nagare haṁsavatiyā,

ahosiṁ māliko tadā;

Ogāhetvā padumasaraṁ,

satapattaṁ ocināmahaṁ.

2 Padumuttaro nāma jino,

sabbadhammāna pāragū;

Saha satasahassehi,

santacittehi tādibhi.

3 Khīṇāsavehi suddhehi,

chaḷabhiññehi jhāyibhi;

Mama vuddhiṁ samanvesaṁ,

āgacchi mama santikaṁ.

4 Disvānahaṁ devadevaṁ,

sayambhuṁ lokanāyakaṁ;

Vaṇṭe chetvā satapattaṁ,

ukkhipimambare tadā.

5 Yadi buddho tuvaṁ vīra,

lokajeṭṭho narāsabho;

Sayaṁ gantvā satapattā,

matthake dhārayantu te.

6 Adhiṭṭhahi mahāvīro,

lokajeṭṭho narāsabho;

Buddhassa ānubhāvena,

matthake dhārayiṁsu te.

7 Tena kammena sukatena,

cetanāpaṇidhīhi ca;

Jahitvā mānusaṁ dehaṁ,

tāvatiṁsamagacchahaṁ.

8 Tattha me sukataṁ byamhaṁ,

satapattanti vuccati;

Saṭṭhiyojanamubbiddhaṁ,

tiṁsayojanavitthataṁ.

9 Sahassakkhattuṁ devindo,

devarajjamakārayiṁ;

Pañcasattatikkhattuñca,

cakkavattī ahosahaṁ.

10 Padesarajjaṁ vipulaṁ,

gaṇanāto asaṅkhiyaṁ;

Anubhomi sakaṁ kammaṁ,

pubbe sukatamattano.

11 Tenevekapadumena,

anubhotvāna sampadā;

Gotamassa bhagavato,

dhammaṁ sacchikariṁ ahaṁ.

12 Kilesā jhāpitā mayhaṁ,

bhavā sabbe samūhatā;

Nāgova bandhanaṁ chetvā,

viharāmi anāsavo.

13 Satasahassito kappe,

yaṁ pupphamabhipūjayiṁ;

Duggatiṁ nābhijānāmi,

ekapadumassidaṁ phalaṁ.

14 Paṭisambhidā catasso,

…pe…

kataṁ buddhassa sāsanaṁ”.

15 Itthaṁ sudaṁ āyasmā ukkhittapadumiyo thero imā gāthāyo abhāsitthāti.

16 Ukkhittapadumiyattherassāpadānaṁ dasamaṁ.

17 Gandhodakavaggo catutiṁsatimo.

18 Tassuddānaṁ

19 Gandhadhūpo udakañca,

punnāga ekadussakā;

Phusito ca pabhaṅkaro,

kuṭido uttarīyako.

20 Savanī ekapadumī,

gāthāyo sabbapiṇḍitā;

Ekaṁ gāthāsatañceva,

catutālīsameva ca.