Milindapañha 194

Milindapañha

Opammakathāpañha

Samuddavagga

4. Sālakalyāṇikaṅgapañha

1 “Bhante nāgasena, ‘sālakalyāṇikāya ekaṁ aṅgaṁ gahetabban’ti yaṁ vadesi, katamaṁ taṁ ekaṁ aṅgaṁ gahetabban”ti? “Yathā, mahārāja, sālakalyāṇikā nāma antopathaviyaṁyeva abhivaḍḍhati hatthasatampi bhiyyopi; evameva kho, mahārāja, yoginā yogāvacarena cattāri sāmaññaphalāni catasso paṭisambhidā chaḷabhiññāyo kevalañca samaṇadhammaṁ suññāgāreyeva paripūrayitabbaṁ. Idaṁ, mahārāja, sālakalyāṇikāya ekaṁ aṅgaṁ gahetabbaṁ. Bhāsitampetaṁ, mahārāja, therena rāhulena—

2 ‘Sālakalyāṇikā nāma,

pādapo dharaṇīruho;

Antopathaviyaṁyeva,

satahatthopi vaḍḍhati.

3 Yathā kālamhi sampatte,

paripākena so dumo;

Uggañchitvāna ekāhaṁ,

satahatthopi vaḍḍhati.

4 Evamevāhaṁ mahāvīra,

sālakalyāṇikā viya;

Abbhantare suññāgāre,

dhammato abhivaḍḍhayin’”ti.

5 Sālakalyāṇikaṅgapañho catuttho.