Milindapañha 61

Milindapañha

Buddhavagga

10. Buddhanidassanapañha

1 Rājā āha—“bhante nāgasena, buddho atthī”ti? “Āma, mahārāja, bhagavā atthī”ti. “Sakkā pana, bhante nāgasena, buddho nidassetuṁ idha vā idha vā”ti? “Parinibbuto, mahārāja, bhagavā anupādisesāya nibbānadhātuyā, na sakkā bhagavā nidassetuṁ ‘idha vā idha vā’”ti.

2 “Opammaṁ karohī”ti. “Taṁ kiṁ maññasi, mahārāja, mahato aggikkhandhassa jalamānassa yā acci atthaṅgatā, sakkā sā acci dassetuṁ ‘idha vā idha vā’”ti? “Na hi, bhante, niruddhā sā acci appaññattiṁ gatā”ti. “Evameva kho, mahārāja, bhagavā anupādisesāya nibbānadhātuyā parinibbuto atthaṅgato, na sakkā bhagavā nidassetuṁ ‘idha vā idha vā’ti, dhammakāyena pana kho, mahārāja, sakkā bhagavā nidassetuṁ. Dhammo hi, mahārāja, bhagavatā desito”ti.

3 “Kallosi, bhante nāgasenā”ti.

4 Buddhanidassanapañho dasamo.

5 Buddhavaggo pañcamo.

6 Imasmiṁ vagge dasa pañhā.