Therāpadāna 413
Therāpadāna
Bhaddālivagga
Bhaddālittheraapadāna
1 “Sumedho nāma sambuddho,
aggo kāruṇiko muni;
Vivekakāmo lokaggo,
himavantamupāgami.
2 Ajjhogāhetvā himavaṁ,
sumedho lokanāyako;
Pallaṅkaṁ ābhujitvāna,
nisīdi purisuttamo.
3 Samādhiṁ so samāpanno,
sumedho lokanāyako;
Sattarattindivaṁ buddho,
nisīdi purisuttamo.
4 Khāribhāraṁ gahetvāna,
vanamajjhogahiṁ ahaṁ;
Tatthaddasāsiṁ sambuddhaṁ,
oghatiṇṇamanāsavaṁ.
5 Sammajjaniṁ gahetvāna,
sammajjitvāna assamaṁ;
Catudaṇḍe ṭhapetvāna,
akāsiṁ maṇḍapaṁ tadā.
6 Sālapupphaṁ āharitvā,
maṇḍapaṁ chādayiṁ ahaṁ;
Pasannacitto sumano,
abhivandiṁ tathāgataṁ.
7 Yaṁ vadanti sumedhoti,
bhūripaññaṁ sumedhasaṁ;
Bhikkhusaṅghe nisīditvā,
imā gāthā abhāsatha.
8 Buddhassa giramaññāya,
sabbe devā samāgamuṁ;
Asaṁsayaṁ buddhaseṭṭho,
dhammaṁ deseti cakkhumā.
9 Sumedho nāma sambuddho,
āhutīnaṁ paṭiggaho;
Devasaṅghe nisīditvā,
imā gāthā abhāsatha.
10 ‘Yo me sattāhaṁ maṇḍapaṁ,
dhārayī sālachāditaṁ;
Tamahaṁ kittayissāmi,
suṇātha mama bhāsato.
11 Devabhūto manusso vā,
hemavaṇṇo bhavissati;
Pahūtabhogo hutvāna,
kāmabhogī bhavissati.
12 Saṭṭhi nāgasahassāni,
sabbālaṅkārabhūsitā;
Suvaṇṇakacchā mātaṅgā,
hemakappanavāsasā.
13 Ārūḷhā gāmaṇīyehi,
tomaraṅkusapāṇibhi;
Sāyaṁ pāto upaṭṭhānaṁ,
āgamissantimaṁ naraṁ;
Tehi nāgehi parivuto,
ramissati ayaṁ naro.
14 Saṭṭhi assasahassāni,
sabbālaṅkārabhūsitā;
Ājānīyāva jātiyā,
sindhavā sīghavāhino.
15 Ārūḷhā gāmaṇīyehi,
illiyācāpadhāribhi;
Parivāressantimaṁ niccaṁ,
buddhapūjāyidaṁ phalaṁ.
16 Saṭṭhi rathasahassāni,
sabbālaṅkārabhūsitā;
Dīpā athopi veyagghā,
sannaddhā ussitaddhajā.
17 Ārūḷhā gāmaṇīyehi,
cāpahatthehi vammibhi;
Parivāressantimaṁ niccaṁ,
buddhapūjāyidaṁ phalaṁ.
18 Saṭṭhi gāmasahassāni,
paripuṇṇāni sabbaso;
Pahūtadhanadhaññāni,
susamiddhāni sabbaso;
Sadā pātubhavissanti,
buddhapūjāyidaṁ phalaṁ.
19 Hatthī assā rathā pattī,
senā ca caturaṅginī;
Parivāressantimaṁ niccaṁ,
buddhapūjāyidaṁ phalaṁ.
20 Aṭṭhārase kappasate,
devaloke ramissati;
Sahassakkhattuṁ rājā ca,
cakkavattī bhavissati.
21 Satānaṁ tīṇikkhattuñca,
devarajjaṁ karissati;
Padesarajjaṁ vipulaṁ,
gaṇanāto asaṅkhiyaṁ.
22 Tiṁsakappasahassamhi,
okkākakulasambhavo;
Gotamo nāma gottena,
satthā loke bhavissati.
23 Tassa dhammesu dāyādo,
oraso dhammanimmito;
Sabbāsave pariññāya,
viharissatināsavo’.
24 Tiṁsakappasahassamhi,
addasaṁ lokanāyakaṁ;
Etthantaramupādāya,
gavesiṁ amataṁ padaṁ.
25 Lābhā mayhaṁ suladdhaṁ me,
yamahaññāsi sāsanaṁ;
Tisso vijjā anuppattā,
kataṁ buddhassa sāsanaṁ.
26 Namo te purisājañña,
namo te purisuttama;
Tava ñāṇaṁ pakittetvā,
pattomhi acalaṁ padaṁ.
27 Yaṁ yaṁ yonupapajjāmi,
devattaṁ atha mānusaṁ;
Sabbattha sukhito homi,
phalaṁ me ñāṇakittane.
28 Idaṁ pacchimakaṁ mayhaṁ,
carimo vattate bhavo;
Nāgova bandhanaṁ chetvā,
viharāmi anāsavo.
29 Kilesā jhāpitā mayhaṁ,
bhavā sabbe samūhatā;
Nāgova bandhanaṁ chetvā,
viharāmi anāsavo.
30 Svāgataṁ vata me āsi,
mama buddhassa santike;
Tisso vijjā anuppattā,
kataṁ buddhassa sāsanaṁ.
31 Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.
32 Itthaṁ sudaṁ āyasmā bhaddālitthero imā gāthāyo abhāsitthāti.
33 Bhaddālittherassāpadānaṁ paṭhamaṁ.