Therāpadāna 129

Therāpadāna

Sereyyavagga

Phaladāyakattheraapadāna

1 “Ajjhāyako mantadharo,

tiṇṇaṁ vedāna pāragū;

Himavantassāvidūre,

vasāmi assame ahaṁ.

2 Aggihuttañca me atthi,

puṇḍarīkaphalāni ca;

Puṭake nikkhipitvāna,

dumagge laggitaṁ mayā.

3 Padumuttaro lokavidū,

āhutīnaṁ paṭiggaho;

Mamuddharitukāmo so,

bhikkhanto mamupāgami.

4 Pasannacitto sumano,

phalaṁ buddhassadāsahaṁ;

Vittisañjanano mayhaṁ,

diṭṭhadhammasukhāvaho.

5 Suvaṇṇavaṇṇo sambuddho,

āhutīnaṁ paṭiggaho;

Antalikkhe ṭhito satthā,

imaṁ gāthaṁ abhāsatha.

6 ‘Iminā phaladānena,

cetanāpaṇidhīhi ca;

Kappānaṁ satasahassaṁ,

duggatiṁ nupapajjati’.

7 Teneva sukkamūlena,

anubhotvāna sampadā;

Pattomhi acalaṁ ṭhānaṁ,

hitvā jayaparājayaṁ.

8 Ito sattasate kappe,

rājā āsiṁ sumaṅgalo;

Sattaratanasampanno,

cakkavattī mahabbalo.

9 Paṭisambhidā catasso,

…pe…

kataṁ buddhassa sāsanaṁ”.

10 Itthaṁ sudaṁ āyasmā phaladāyako thero imā gāthāyo abhāsitthāti.

11 Phaladāyakattherassāpadānaṁ sattamaṁ.