Therāpadāna 13

Therāpadāna

Sīhāsaniyavagga

Sīhāsanadāyakattheraapadāna

1 “Nibbute lokanāthamhi,

siddhatthe dvipaduttame;

Vitthārike pāvacane,

bāhujaññamhi sāsane.

2 Pasannacitto sumano,

sīhāsanamakāsahaṁ;

Sīhāsanaṁ karitvāna,

pādapīṭhamakāsahaṁ.

3 Sīhāsane ca vassante,

gharaṁ tattha akāsahaṁ;

Tena cittappasādena,

tusitaṁ upapajjahaṁ.

4 Āyāmena catubbīsa-

yojanaṁ āsi tāvade;

Vimānaṁ sukataṁ mayhaṁ,

vitthārena catuddasa.

5 Sataṁ kaññāsahassāni,

parivārenti maṁ sadā;

Soṇṇamayañca pallaṅkaṁ,

byamhe āsi sunimmitaṁ.

6 Hatthiyānaṁ assayānaṁ,

dibbayānaṁ upaṭṭhitaṁ;

Pāsādā sivikā ceva,

nibbattanti yadicchakaṁ.

7 Maṇimayā ca pallaṅkā,

aññe sāramayā bahū;

Nibbattanti mamaṁ sabbe,

sīhāsanassidaṁ phalaṁ.

8 Soṇṇamayā rūpimayā,

phalikāveḷuriyāmayā;

Pādukā abhirūhāmi,

pādapīṭhassidaṁ phalaṁ.

9 Catunnavutito kappe,

yaṁ kammamakariṁ tadā;

Duggatiṁ nābhijānāmi,

puññakammassidaṁ phalaṁ.

10 Tesattatimhito kappe,

indanāmā tayo janā;

Dvesattatimhito kappe,

tayo sumananāmakā.

11 Samasattatito kappe,

tayo varuṇanāmakā;

Sattaratanasampannā,

catudīpamhi issarā.

12 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

13 Itthaṁ sudaṁ āyasmā sīhāsanadāyako thero imā gāthāyo abhāsitthāti.

14 Sīhāsanadāyakattherassāpadānaṁ paṭhamaṁ.