Therāpadāna 443

Therāpadāna

Vibhītakavagga

1 Vibhītakamiñjiyattheraapadāna

1 “Kakusandho mahāvīro,

sabbadhammāna pāragū;

Gaṇamhā vūpakaṭṭho so,

agamāsi vanantaraṁ.

2 Bījamiñjaṁ gahetvāna,

latāya āvuṇiṁ ahaṁ;

Bhagavā tamhi samaye,

jhāyate pabbatantare.

3 Disvānahaṁ devadevaṁ,

vippasannena cetasā;

Dakkhiṇeyyassa vīrassa,

bījamiñjamadāsahaṁ.

4 Imasmiṁyeva kappamhi,

yaṁ miñjamadadiṁ tadā;

Duggatiṁ nābhijānāmi,

bījamiñjassidaṁ phalaṁ.

5 Kilesā jhāpitā mayhaṁ,

bhavā sabbe samūhatā;

Nāgova bandhanaṁ chetvā,

viharāmi anāsavo.

6 Svāgataṁ vata me āsi,

mama buddhassa santike;

Tisso vijjā anuppattā,

kataṁ buddhassa sāsanaṁ.

7 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

8 Itthaṁ sudaṁ āyasmā vibhītakamiñjiyo thero imā gāthāyo abhāsitthāti.

9 Vibhītakamiñjiyattherassāpadānaṁ paṭhamaṁ.