Vimānavatthu 35

Vimānavatthu

Itthivimāna

Pāricchattakavagga

7. Pesavatīvimānavatthu

1 “Phalikarajatahemajālachannaṁ,

Vividhacitratalamaddasaṁ surammaṁ;

Byamhaṁ sunimmitaṁ toraṇūpapannaṁ,

Rucakupakiṇṇamidaṁ subhaṁ vimānaṁ.

2 Bhāti ca dasa disā nabheva suriyo,

Sarade tamonudo sahassaraṁsī;

Tathā tapati midaṁ tava vimānaṁ,

Jalamiva dhūmasikho nise nabhagge.

3 Musatīva nayanaṁ sateratāva,

Ākāse ṭhapitamidaṁ manuññaṁ;

Vīṇāmurajasammatāḷaghuṭṭhaṁ,

Iddhaṁ indapuraṁ yathā tavedaṁ.

4 Padumakumuduppalakuvalayaṁ,

Yodhika bandhukanojakā ca santi;

Sālakusumitapupphitā asokā,

Vividhadumaggasugandhasevitamidaṁ.

5 Saḷalalabujabhujaka saṁyuttā,

Kusakasuphullitalatāvalambinīhi;

Maṇijālasadisā yasassinī,

Rammā pokkharaṇī upaṭṭhitā te.

6 Udakaruhā ca yetthi pupphajātā,

Thalajā ye ca santi rukkhajātā;

Mānusakāmānussakā ca dibbā,

Sabbe tuyhaṁ nivesanamhi jātā.

7 Kissa saṁyamadamassayaṁ vipāko,

Kenāsi kammaphalenidhūpapannā;

Yathā ca te adhigatamidaṁ vimānaṁ,

Tadanupadaṁ avacāsiḷārapamhe”ti.

8 “Yathā ca me adhigatamidaṁ vimānaṁ,

Koñcamayūracakorasaṅghacaritaṁ;

Dibyapilavahaṁsarājaciṇṇaṁ,

Dijakāraṇḍavakokilābhinaditaṁ.

9 Nānāsantānakapuppharukkhavividhā,

Pāṭalijambuasokarukkhavantaṁ;

Yathā ca me adhigatamidaṁ vimānaṁ,

Taṁ te pavedayāmi suṇohi bhante.

10 Magadhavarapuratthimena,

Nāḷakagāmo nāma atthi bhante;

Tattha ahosiṁ pure suṇisā,

Pesavatīti tattha jāniṁsu mamaṁ.

11 Sāhamapacitatthadhammakusalaṁ,

Devamanussapūjitaṁ mahantaṁ;

Upatissaṁ nibbutamappameyyaṁ,

Muditamanā kusumehi abbhukiriṁ.

12 Paramagatigatañca pūjayitvā,

Antimadehadharaṁ isiṁ uḷāraṁ;

Pahāya mānusakaṁ samussayaṁ,

Tidasagatā idha māvasāmi ṭhānan”ti.

13 Pesavatīvimānaṁ sattamaṁ.