Kathāvatthu 72

Kathāvatthu

Mahāpaṇṇāsaka

Sattamavagga

Ariyadhammavipākakathā

1 Natthi ariyadhammavipākoti? Āmantā. Nanu mahapphalaṁ sāmaññaṁ mahapphalaṁ brahmaññanti? Āmantā. Hañci mahapphalaṁ sāmaññaṁ mahapphalaṁ brahmaññaṁ, no ca vata re vattabbe—“natthi ariyadhammavipāko”ti.

2 Natthi ariyadhammavipākoti? Āmantā. Nanu atthi sotāpattiphalanti? Āmantā. Hañci atthi sotāpattiphalaṁ, no ca vata re vattabbe—“natthi ariyadhammavipāko”ti. Nanu atthi sakadāgāmiphalaṁ …pe… anāgāmiphalaṁ …pe… arahattaphalanti? Āmantā. Hañci atthi arahattaphalaṁ, no ca vata re vattabbe—“natthi ariyadhammavipāko”ti.

3 Sotāpattiphalaṁ na vipākoti? Āmantā. Dānaphalaṁ na vipākoti? Na hevaṁ vattabbe …pe… sotāpattiphalaṁ na vipākoti? Āmantā. Sīlaphalaṁ …pe… bhāvanāphalaṁ na vipākoti? Na hevaṁ vattabbe …pe….

4 Sakadāgāmiphalaṁ …pe… anāgāmiphalaṁ …pe… arahattaphalaṁ na vipākoti? Āmantā. Dānaphalaṁ na vipākoti? Na hevaṁ vattabbe …pe… arahattaphalaṁ na vipākoti? Āmantā. Sīlaphalaṁ …pe… bhāvanāphalaṁ na vipākoti? Na hevaṁ vattabbe …pe… dānaphalaṁ vipākoti? Āmantā. Sotāpattiphalaṁ vipākoti? Na hevaṁ vattabbe …pe…

5 Dānaphalaṁ vipākoti? Āmantā. Sakadāgāmiphalaṁ …pe… anāgāmiphalaṁ …pe… arahattaphalaṁ vipākoti? Na hevaṁ vattabbe …pe… sīlaphalaṁ …pe… bhāvanāphalaṁ vipākoti? Āmantā. Sotāpattiphalaṁ vipākoti? Na hevaṁ vattabbe …pe… bhāvanāphalaṁ vipākoti? Āmantā. Sakadāgāmiphalaṁ …pe… anāgāmiphalaṁ …pe… arahattaphalaṁ vipākoti? Na hevaṁ vattabbe …pe….

6 Kāmāvacaraṁ kusalaṁ savipākanti? Āmantā. Lokuttaraṁ kusalaṁ savipākanti? Na hevaṁ vattabbe …pe… rūpāvacaraṁ kusalaṁ …pe… arūpāvacaraṁ kusalaṁ savipākanti? Āmantā. Lokuttaraṁ kusalaṁ savipākanti? Na hevaṁ vattabbe …pe….

7 Lokuttaraṁ kusalaṁ avipākanti? Āmantā. Kāmāvacaraṁ kusalaṁ avipākanti? Na hevaṁ vattabbe …pe… lokuttaraṁ kusalaṁ avipākanti? Āmantā. Rūpāvacaraṁ …pe… arūpāvacaraṁ kusalaṁ avipākanti? Na hevaṁ vattabbe …pe….

8 Kāmāvacaraṁ kusalaṁ savipākaṁ ācayagāmīti? Āmantā. Lokuttaraṁ kusalaṁ savipākaṁ ācayagāmīti? Na hevaṁ vattabbe …pe… rūpāvacaraṁ …pe… arūpāvacaraṁ kusalaṁ savipākaṁ ācayagāmīti? Āmantā. Lokuttaraṁ kusalaṁ savipākaṁ ācayagāmīti? Na hevaṁ vattabbe …pe….

9 Lokuttaraṁ kusalaṁ savipākaṁ apacayagāmīti? Āmantā. Kāmāvacaraṁ kusalaṁ savipākaṁ apacayagāmīti? Na hevaṁ vattabbe …pe…. Lokuttaraṁ kusalaṁ savipākaṁ apacayagāmīti? Āmantā. Rūpāvacaraṁ …pe… arūpāvacaraṁ kusalaṁ savipākaṁ apacayagāmīti? Na hevaṁ vattabbe …pe….

Ariyadhammavipākakathā niṭṭhitā.