Kathāvatthu 73

Kathāvatthu

Mahāpaṇṇāsaka

Sattamavagga

Vipākovipākadhammadhammotikathā

1 Vipāko vipākadhammadhammoti? Āmantā. Tassa vipāko vipākadhammadhammoti? Na hevaṁ vattabbe …pe… tassa vipāko vipākadhammadhammoti? Āmantā. Tassa tasseva natthi dukkhassa antakiriyā natthi vaṭṭupacchedo natthi anupādāparinibbānanti? Na hevaṁ vattabbe …pe….

2 Vipāko vipākadhammadhammoti? Āmantā. Vipākoti vā vipākadhammadhammoti vā vipākadhammadhammoti vā vipākoti vā esese ekaṭṭhe same samabhāge tajjāteti? Na hevaṁ vattabbe …pe….

3 Vipāko vipākadhammadhammoti? Āmantā. Vipāko ca vipākadhammadhammo ca vipākadhammadhammo ca vipāko ca sahagatā sahajātā saṁsaṭṭhā sampayuttā ekuppādā ekanirodhā ekavatthukā ekārammaṇāti? Na hevaṁ vattabbe …pe….

4 Vipāko vipākadhammadhammoti? Āmantā. Taññeva akusalaṁ so akusalassa vipāko, taññeva kusalaṁ so kusalassa vipākoti? Na hevaṁ vattabbe …pe….

5 Vipāko vipākadhammadhammoti? Āmantā. Yeneva cittena pāṇaṁ hanati teneva cittena niraye paccati, yeneva cittena dānaṁ deti teneva cittena sagge modatīti? Na hevaṁ vattabbe …pe….

6 Na vattabbaṁ—“vipāko vipākadhammadhammo”ti? Āmantā. Nanu vipākā cattāro khandhā arūpino aññamaññapaccayāti? Āmantā. Hañci vipākā cattāro khandhā arūpino aññamaññapaccayā, tena vata re vattabbe—“vipāko vipākadhammadhammo”ti.

Vipāko vipākadhammadhammotikathā niṭṭhitā. Sattamo vaggo.

Tassuddānaṁ

7 Saṅgaho, sampayutto, cetasiko dhammo, cetasikaṁ dānaṁ, paribhogamayaṁ puññaṁ vaḍḍhati, ito dinnena tattha yāpenti, pathavī kammavipāko, jarāmaraṇaṁ vipāko, natthi ariyadhammavipāko, vipāko vipākadhammadhammoti.