Petavatthu 3

Petavatthu

Uragavagga

3. Pūtimukhapetavatthu

1 “Dibbaṁ subhaṁ dhāresi vaṇṇadhātuṁ,

Vehāyasaṁ tiṭṭhasi antalikkhe;

Mukhañca te kimayo pūtigandhaṁ,

Khādanti kiṁ kammamakāsi pubbe”.

2 “Samaṇo ahaṁ pāpotiduṭṭhavāco,

Tapassirūpo mukhasā asaññato;

Laddhā ca me tapasā vaṇṇadhātu,

Mukhañca me pesuṇiyena pūti.

3 Tayidaṁ tayā nārada sāmaṁ diṭṭhaṁ,

Anukampakā ye kusalā vadeyyuṁ;

‘Mā pesuṇaṁ mā ca musā abhāṇi,

Yakkho tuvaṁ hohisi kāmakāmī’”ti.

4 Pūtimukhapetavatthu tatiyaṁ.