Therāpadāna 10

Therāpadāna

Buddhavagga

Piṇḍolabhāradvājattheraapadāna

1 “Padumuttaro nāma jino,

sayambhū aggapuggalo;

Purato himavantassa,

cittakūṭe vasī tadā.

2 Abhītarūpo tatthāsiṁ,

migarājā catukkamo;

Tassa saddaṁ suṇitvāna,

vikkhambhanti bahujjanā.

3 Suphullaṁ padumaṁ gayha,

upagacchiṁ narāsabhaṁ;

Vuṭṭhitassa samādhimhā,

buddhassa abhiropayiṁ.

4 Catuddisaṁ namassitvā,

buddhaseṭṭhaṁ naruttamaṁ;

Sakaṁ cittaṁ pasādetvā,

sīhanādaṁ nadiṁ ahaṁ.

5 Padumuttaro lokavidū,

āhutīnaṁ paṭiggaho;

Sakāsane nisīditvā,

imā gāthā abhāsatha.

6 Buddhassa giramaññāya,

Sabbe devā samāgatā;

‘Āgato vadataṁ seṭṭho,

Dhammaṁ sossāma taṁ mayaṁ’.

7 Tesaṁ hāsaparetānaṁ,

purato lokanāyako;

Mama saddaṁ pakittesi,

dīghadassī mahāmuni.

8 Yenidaṁ padumaṁ dinnaṁ,

sīhanādo ca nādito;

Tamahaṁ kittayissāmi,

suṇātha mama bhāsato.

9 Ito aṭṭhamake kappe,

cakkavattī bhavissati;

Sattaratanasampanno,

catudīpamhi issaro.

10 Kārayissati issariyaṁ,

mahiyā catusaṭṭhiyā;

Padumo nāma nāmena,

cakkavattī mahabbalo.

11 Kappasatasahassamhi,

okkākakulasambhavo;

Gotamo nāma gottena,

satthā loke bhavissati.

12 Pakāsite pāvacane,

brahmabandhu bhavissati;

Brahmaññā abhinikkhamma,

pabbajissati tāvade.

13 Padhānapahitatto so,

upasanto nirūpadhi;

Sabbāsave pariññāya,

nibbāyissatināsavo.

14 Vijane pantaseyyamhi,

vāḷamigasamākule;

Sabbāsave pariññāya,

nibbāyissatināsavo.

15 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

16 Itthaṁ sudaṁ āyasmā piṇḍolabhāradvājo thero imā gāthāyo abhāsitthāti.

17 Piṇḍolabhāradvājattherassāpadānaṁ aṭṭhamaṁ.