Therāpadāna 111

Therāpadāna

Bhikkhadāyivagga

1 “Himavantassāvidūre,

vasāmi paṇṇasanthare;

Ghāsesu gedhamāpanno,

seyyasīlo cahaṁ tadā.

2 Khaṇantālu kalambāni,

biḷālitakkalāni ca;

Kolaṁ bhallātakaṁ billaṁ,

āhatvā paṭiyāditaṁ.

3 Padumuttaro lokavidū,

āhutīnaṁ paṭiggaho;

Mama saṅkappamaññāya,

āgacchi mama santikaṁ.

4 Upāgataṁ mahānāgaṁ,

devadevaṁ narāsabhaṁ;

Biḷāliṁ paggahetvāna,

pattamhi okiriṁ ahaṁ.

5 Paribhuñji mahāvīro,

tosayanto mamaṁ tadā;

Paribhuñjitvāna sabbaññū,

imaṁ gāthaṁ abhāsatha.

6 ‘Sakaṁ cittaṁ pasādetvā,

biḷāliṁ me adā tuvaṁ;

Kappānaṁ satasahassaṁ,

duggatiṁ nupapajjasi’.

7 Carimaṁ vattate mayhaṁ,

bhavā sabbe samūhatā;

Dhāremi antimaṁ dehaṁ,

sammāsambuddhasāsane.

8 Catupaññāsito kappe,

sumekhaliyasavhayo;

Sattaratanasampanno,

cakkavattī mahabbalo.

9 Paṭisambhidā catasso,

…pe…

kataṁ buddhassa sāsanaṁ”.

10 Itthaṁ sudaṁ āyasmā biḷālidāyako thero imā gāthāyo abhāsitthāti.

11 Biḷālidāyakattherassāpadānaṁ navamaṁ.