Therāpadāna 16
Therāpadāna
Sīhāsaniyavagga
4 Cūḷapanthakattheraapadāna
1 “Padumuttaro nāma jino,
āhutīnaṁ paṭiggaho;
Gaṇamhā vūpakaṭṭho so,
himavante vasī tadā.
2 Ahampi himavantamhi,
vasāmi assame tadā;
Acirāgataṁ mahāvīraṁ,
upesiṁ lokanāyakaṁ.
3 Pupphacchattaṁ gahetvāna,
upagacchiṁ narāsabhaṁ;
Samādhiṁ samāpajjantaṁ,
antarāyamakāsahaṁ.
4 Ubho hatthehi paggayha,
pupphacchattaṁ adāsahaṁ;
Paṭiggahesi bhagavā,
padumuttaro mahāmuni.
5 Sabbe devā attamanā,
himavantaṁ upenti te;
Sādhukāraṁ pavattesuṁ,
anumodissati cakkhumā.
6 Idaṁ vatvāna te devā,
upagacchuṁ naruttamaṁ;
Ākāse dhārayantassa,
padumacchattamuttamaṁ.
7 Satapattachattaṁ paggayha,
adāsi tāpaso mama;
‘Tamahaṁ kittayissāmi,
suṇātha mama bhāsato.
8 Pañcavīsatikappāni,
devarajjaṁ karissati;
Catuttiṁsatikkhattuñca,
cakkavattī bhavissati.
9 Yaṁ yaṁ yoniṁ saṁsarati,
devattaṁ atha mānusaṁ;
Abbhokāse patiṭṭhantaṁ,
padumaṁ dhārayissati.
10 Kappasatasahassamhi,
okkākakulasambhavo;
Gotamo nāma gottena,
satthā loke bhavissati.
11 Pakāsite pāvacane,
manussattaṁ labhissati;
Manomayamhi kāyamhi,
uttamo so bhavissati.
12 Dve bhātaro bhavissanti,
ubhopi panthakavhayā;
Anubhotvā uttamatthaṁ,
jotayissanti sāsanaṁ’.
13 Sohaṁ aṭṭhārasavasso,
pabbajiṁ anagāriyaṁ;
Visesāhaṁ na vindāmi,
sakyaputtassa sāsane.
14 Dandhā mayhaṁ gatī āsi,
paribhūto pure ahuṁ;
Bhātā ca maṁ paṇāmesi,
gaccha dāni sakaṁ gharaṁ.
15 Sohaṁ paṇāmito santo,
saṅghārāmassa koṭṭhake;
Dummano tattha aṭṭhāsiṁ,
sāmaññasmiṁ apekkhavā.
16 Bhagavā tattha āgacchi,
sīsaṁ mayhaṁ parāmasi;
Bāhāya maṁ gahetvāna,
saṅghārāmaṁ pavesayi.
17 Anukampāya me satthā,
adāsi pādapuñchaniṁ;
Evaṁ suddhaṁ adhiṭṭhehi,
ekamantamadhiṭṭhahaṁ.
18 Hatthehi tamahaṁ gayha,
sariṁ kokanadaṁ ahaṁ;
Tattha cittaṁ vimucci me,
arahattaṁ apāpuṇiṁ.
19 Manomayesu kāyesu,
sabbattha pāramiṁ gato;
Sabbāsave pariññāya,
viharāmi anāsavo.
20 Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.
21 Itthaṁ sudaṁ āyasmā cūḷapanthako thero imā gāthāyo abhāsitthāti.
22 Cūḷapanthakattherassāpadānaṁ catutthaṁ.