Therāpadāna 208

Therāpadāna

Kaṇikārapupphiyavagga

Udakadāyakattheraapadāna

1 “Bhuñjantaṁ samaṇaṁ disvā,

vippasannamanāvilaṁ;

Ghaṭenodakamādāya,

siddhatthassa adāsahaṁ.

2 Nimmalo homahaṁ ajja,

vimalo khīṇasaṁsayo;

Bhave nibbattamānamhi,

phalaṁ nibbattate mama.

3 Catunnavutito kappe,

udakaṁ yamadāsahaṁ;

Duggatiṁ nābhijānāmi,

dakadānassidaṁ phalaṁ.

4 Ekasaṭṭhimhito kappe,

ekova vimalo ahu;

Sattaratanasampanno,

cakkavattī mahabbalo.

5 Paṭisambhidā catasso,

…pe…

kataṁ buddhassa sāsanaṁ”.

6 Itthaṁ sudaṁ āyasmā udakadāyako thero imā gāthāyo abhāsitthāti.

7 Udakadāyakattherassāpadānaṁ chaṭṭhaṁ.