Therāpadāna 44

Therāpadāna

Upālivagga

2 Soṇakoḷivisattheraapadāna

1 “Anomadassissa munino,

lokajeṭṭhassa tādino;

Sudhāya lepanaṁ katvā,

caṅkamaṁ kārayiṁ ahaṁ.

2 Nānāvaṇṇehi pupphehi,

caṅkamaṁ santhariṁ ahaṁ;

Ākāse vitānaṁ katvā,

bhojayiṁ buddhamuttamaṁ.

3 Añjaliṁ paggahetvāna,

abhivādetvāna subbataṁ;

Dīghasālaṁ bhagavato,

niyyādesimahaṁ tadā.

4 Mama saṅkappamaññāya,

satthā loke anuttaro;

Paṭiggahesi bhagavā,

anukampāya cakkhumā.

5 Paṭiggahetvāna sambuddho,

dakkhiṇeyyo sadevake;

Bhikkhusaṅghe nisīditvā,

imā gāthā abhāsatha.

6 ‘Yo so haṭṭhena cittena,

dīghasālaṁ adāsi me;

Tamahaṁ kittayissāmi,

suṇātha mama bhāsato.

7 Imassa maccukālamhi,

puññakammasamaṅgino;

Sahassayuttassaratho,

upaṭṭhissati tāvade.

8 Tena yānenayaṁ poso,

devalokaṁ gamissati;

Anumodissare devā,

sampatte kusalabbhave.

9 Mahārahaṁ byamhaṁ seṭṭhaṁ,

ratanamattikalepanaṁ;

Kūṭāgāravarūpetaṁ,

byamhaṁ ajjhāvasissati.

10 Tiṁsakappasahassāni,

devaloke ramissati;

Pañcavīsati kappāni,

devarājā bhavissati.

11 Sattasattatikkhattuñca,

cakkavattī bhavissati;

Yasodharasanāmā te,

sabbepi ekanāmakā.

12 Dve sampattī anubhotvā,

Vaḍḍhetvā puññasañcayaṁ;

Aṭṭhavīsatikappamhi,

Cakkavattī bhavissati.

13 Tatrāpi byamhaṁ pavaraṁ,

vissakammena māpitaṁ;

Dasasaddāvivittaṁ taṁ,

puramajjhāvasissati.

14 Aparimeyye ito kappe,

bhūmipālo mahiddhiko;

Okkāko nāma nāmena,

rājā raṭṭhe bhavissati.

15 Soḷasitthisahassānaṁ,

sabbāsaṁ pavarā ca sā;

Abhijātā khattiyānī,

nava putte janessati.

16 Nava putte janetvāna,

khattiyānī marissati;

Taruṇī ca piyā kaññā,

mahesittaṁ karissati.

17 Okkākaṁ tosayitvāna,

varaṁ kaññā labhissati;

Varaṁ laddhāna sā kaññā,

putte pabbājayissati.

18 Pabbājitā ca te sabbe,

gamissanti naguttamaṁ;

Jātibhedabhayā sabbe,

bhaginīhi vasissare.

19 Ekā ca kaññā byādhīhi,

bhavissati parikkhatā;

Mā no jāti pabhijjīti,

nikhaṇissanti khattiyā.

20 Khattiyo nīharitvāna,

tāya saddhiṁ vasissati;

Bhavissati tadā bhedo,

okkākakulasambhavo.

21 Tesaṁ pajā bhavissanti,

koḷiyā nāma jātiyā;

Tattha mānusakaṁ bhogaṁ,

anubhossatinappakaṁ.

22 Tamhā kāyā cavitvāna,

devalokaṁ gamissati;

Tatrāpi pavaraṁ byamhaṁ,

labhissati manoramaṁ.

23 Devalokā cavitvāna,

sukkamūlena codito;

Āgantvāna manussattaṁ,

soṇo nāma bhavissati.

24 Āraddhavīriyo pahitatto,

Padahaṁ satthu sāsane;

Sabbāsave pariññāya,

Nibbāyissatināsavo.

25 Anantadassī bhagavā,

gotamo sakyapuṅgavo;

Visesaññū mahāvīro,

aggaṭṭhāne ṭhapessati’.

26 Vuṭṭhamhi deve caturaṅgulamhi,

Tiṇe anileritaaṅgaṇamhi;

Ṭhatvāna yogassa payuttatādino,

Tatottariṁ pāramatā na vijjati.

27 Uttame damathe danto,

cittaṁ me supaṇīhitaṁ;

Bhāro me ohito sabbo,

nibbutomhi anāsavo.

28 Aṅgīraso mahānāgo,

abhijātova kesarī;

Bhikkhusaṅghe nisīditvā,

etadagge ṭhapesi maṁ.

29 Paṭisambhidā catasso,

…pe…

kataṁ buddhassa sāsanaṁ”.

30 Itthaṁ sudaṁ āyasmā soṇo koḷiviso thero imā gāthāyo abhāsitthāti.

31 Soṇakoḷivisattherassāpadānaṁ dutiyaṁ.