1 Yo rūpakkhandhaṁ parijānāti so vedanākkhandhaṁ parijānissatīti? No.
2 Yo vā pana vedanākkhandhaṁ parijānissati so rūpakkhandhaṁ parijānātīti? No.
3 Yo rūpakkhandhaṁ na parijānāti so vedanākkhandhaṁ na parijānissatīti?
4 Ye maggaṁ paṭilabhissanti te rūpakkhandhaṁ na parijānanti, no ca vedanākkhandhaṁ na parijānissanti. Arahā ye ca puthujjanā maggaṁ na paṭilabhissanti te rūpakkhandhañca na parijānanti vedanākkhandhañca na parijānissanti.
5 Yo vā pana vedanākkhandhaṁ na parijānissati so rūpakkhandhaṁ na parijānātīti?
6 Aggamaggasamaṅgī vedanākkhandhaṁ na parijānissati, no ca rūpakkhandhaṁ na parijānāti. Arahā ye ca puthujjanā maggaṁ na paṭilabhissanti te vedanākkhandhañca na parijānissanti rūpakkhandhañca na parijānanti.