Kathāvatthu 29

Kathāvatthu

Mahāpaṇṇāsaka

Tatiyavagga

Dibbasotakathā

1 Maṁsasotaṁ dhammupatthaddhaṁ dibbasotaṁ hotīti? Āmantā. Maṁsasotaṁ dibbasotaṁ, dibbasotaṁ maṁsasotanti? Na hevaṁ vattabbe …pe….

2 Maṁsasotaṁ dhammupatthaddhaṁ dibbasotaṁ hotīti? Āmantā. Yādisaṁ maṁsasotaṁ tādisaṁ dibbasotaṁ, yādisaṁ dibbasotaṁ tādisaṁ maṁsasotanti? Na hevaṁ vattabbe …pe….

3 Maṁsasotaṁ dhammupatthaddhaṁ dibbasotaṁ hotīti? Āmantā. Taññeva maṁsasotaṁ taṁ dibbasotaṁ, taṁ dibbasotaṁ taṁ maṁsasotanti? Na hevaṁ vattabbe …pe….

4 Maṁsasotaṁ dhammupatthaddhaṁ dibbasotaṁ hotīti? Āmantā. Yādiso maṁsasotassa visayo ānubhāvo gocaro tādiso dibbassa sotassa visayo ānubhāvo gocaroti? Na hevaṁ vattabbe …pe….

5 Maṁsasotaṁ dhammupatthaddhaṁ dibbasotaṁ hotīti? Āmantā. Upādinnaṁ hutvā anupādinnaṁ hotīti? Na hevaṁ vattabbe …pe….

6 Upādinnaṁ hutvā anupādinnaṁ hotīti? Āmantā. Kāmāvacaraṁ hutvā rūpāvacaraṁ hotīti? Na hevaṁ vattabbe …pe….

7 Kāmāvacaraṁ hutvā rūpāvacaraṁ hotīti? Āmantā. Rūpāvacaraṁ hutvā arūpāvacaraṁ hotīti? Na hevaṁ vattabbe …pe….

8 Rūpāvacaraṁ hutvā arūpāvacaraṁ hotīti? Āmantā. Pariyāpannaṁ hutvā apariyāpannaṁ hotīti? Na hevaṁ vattabbe …pe….

9 Maṁsasotaṁ dhammupatthaddhaṁ dibbasotaṁ hotīti? Āmantā. Dibbasotaṁ dhammupatthaddhaṁ maṁsasotaṁ hotīti? Na hevaṁ vattabbe …pe….

10 Maṁsasotaṁ dhammupatthaddhaṁ dibbasotaṁ hotīti? Āmantā. Ekaṁyeva sotanti? Na hevaṁ vattabbe …pe….

11 Ekaṁyeva sotanti? Āmantā. Nanu dve sotāni vuttāni bhagavatā—“maṁsasotaṁ, dibbasotan”ti? Āmantā. Hañci dve sotāni vuttāni bhagavatā—maṁsasotaṁ, dibbasotaṁ, no ca vata re vattabbe—“ekaññeva sotan”ti.

Dibbasotakathā niṭṭhitā.