Therāpadāna 17

Therāpadāna

Sīhāsaniyavagga

5 Pilindavacchattheraapadāna

1 “Nibbute lokanāthamhi,

sumedhe aggapuggale;

Pasannacitto sumano,

thūpapūjaṁ akāsahaṁ.

2 Ye ca khīṇāsavā tattha,

chaḷabhiññā mahiddhikā;

Tehaṁ tattha samānetvā,

saṅghabhattaṁ akāsahaṁ.

3 Sumedhassa bhagavato,

upaṭṭhāko tadā ahu;

Sumedho nāma nāmena,

anumodittha so tadā.

4 Tena cittappasādena,

vimānaṁ upapajjahaṁ;

Chaḷāsītisahassāni,

accharāyo ramiṁsu me.

5 Mameva anuvattanti,

sabbakāmehi tā sadā;

Aññe deve abhibhomi,

puññakammassidaṁ phalaṁ.

6 Pañcavīsatikappamhi,

varuṇo nāma khattiyo;

Visuddhabhojano āsiṁ,

cakkavattī ahaṁ tadā.

7 Na te bījaṁ pavapanti,

napi nīyanti naṅgalā;

Akaṭṭhapākimaṁ sāliṁ,

paribhuñjanti mānusā.

8 Tattha rajjaṁ karitvāna,

devattaṁ puna gacchahaṁ;

Tadāpi edisā mayhaṁ,

nibbattā bhogasampadā.

9 Na maṁ mittā amittā vā,

hiṁsanti sabbapāṇino;

Sabbesampi piyo homi,

puññakammassidaṁ phalaṁ.

10 Tiṁsakappasahassamhi,

yaṁ dānamadadiṁ tadā;

Duggatiṁ nābhijānāmi,

gandhālepassidaṁ phalaṁ.

11 Imasmiṁ bhaddake kappe,

eko āsiṁ janādhipo;

Mahānubhāvo rājāhaṁ,

cakkavattī mahabbalo.

12 Sohaṁ pañcasu sīlesu,

ṭhapetvā janataṁ bahuṁ;

Pāpetvā sugatiṁyeva,

devatānaṁ piyo ahuṁ.

13 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

14 Itthaṁ sudaṁ āyasmā pilindavaccho thero imā gāthāyo abhāsitthāti.

15 Pilindavacchattherassāpadānaṁ pañcamaṁ.