Buddhavaṁsa 26

Buddhavaṁsa

26. Kassapabuddhavaṁsa

1 “Koṇāgamanassa aparena,

Sambuddho dvipaduttamo;

Kassapo nāma gottena,

Dhammarājā pabhaṅkaro.

2 Sañchaḍḍitaṁ kulamūlaṁ,

bahvannapānabhojanaṁ;

Datvāna yācake dānaṁ,

pūrayitvāna mānasaṁ;

Usabhova āḷakaṁ bhetvā,

patto sambodhimuttamaṁ.

3 Dhammacakkaṁ pavattente,

kassape lokanāyake;

Vīsakoṭisahassānaṁ,

paṭhamābhisamayo ahu.

4 Catumāsaṁ yadā buddho,

loke carati cārikaṁ;

Dasakoṭisahassānaṁ,

dutiyābhisamayo ahu.

5 Yamakaṁ vikubbanaṁ katvā,

ñāṇadhātuṁ pakittayi;

Pañcakoṭisahassānaṁ,

tatiyābhisamayo ahu.

6 Sudhammā devapure ramme,

tattha dhammaṁ pakittayi;

Tīṇikoṭisahassānaṁ,

devānaṁ bodhayī jino.

7 Naradevassa yakkhassa,

apare dhammadesane;

Etesānaṁ abhisamayā,

gaṇanāto asaṅkhiyā.

8 Tassāpi devadevassa,

eko āsi samāgamo;

Khīṇāsavānaṁ vimalānaṁ,

santacittāna tādinaṁ.

9 Vīsabhikkhusahassānaṁ,

tadā āsi samāgamo;

Atikkantabhavantānaṁ,

hirisīlena tādinaṁ.

10 Ahaṁ tadā māṇavako,

jotipāloti vissuto;

Ajjhāyako mantadharo,

tiṇṇaṁ vedāna pāragū.

11 Lakkhaṇe itihāse ca,

sadhamme pāramiṁ gato;

Bhūmantalikkhakusalo,

katavijjo anāvayo.

12 Kassapassa bhagavato,

ghaṭīkāro nāmupaṭṭhāko;

Sagāravo sappatisso,

nibbuto tatiye phale.

13 Ādāya maṁ ghaṭīkāro,

upagañchi kassapaṁ jinaṁ;

Tassa dhammaṁ suṇitvāna,

pabbajiṁ tassa santike.

14 Āraddhavīriyo hutvā,

vattāvattesu kovido;

Na kvaci parihāyāmi,

pūresiṁ jinasāsanaṁ.

15 Yāvatā buddhabhaṇitaṁ,

navaṅgaṁ jinasāsanaṁ;

Sabbaṁ pariyāpuṇitvāna,

sobhayiṁ jinasāsanaṁ.

16 Mama acchariyaṁ disvā,

sopi buddho viyākari;

‘Imamhi bhaddake kappe,

ayaṁ buddho bhavissati.

17 Ahu kapilavhayā rammā,

nikkhamitvā tathāgato;

Padhānaṁ padahitvāna,

katvā dukkarakārikaṁ.

18 Ajapālarukkhamūle,

nisīditvā tathāgato;

Tattha pāyāsaṁ paggayha,

nerañjaramupehiti.

19 Nerañjarāya tīramhi,

pāyāsaṁ paribhuñjiya;

Paṭiyattavaramaggena,

bodhimūlamupehiti.

20 Tato padakkhiṇaṁ katvā,

bodhimaṇḍaṁ anuttaro;

Aparājitaṭṭhānamhi,

bodhipallaṅkamuttame;

Pallaṅkena nisīditvā,

bujjhissati mahāyaso.

21 Imassa janikā mātā,

māyā nāma bhavissati;

Pitā suddhodano nāma,

ayaṁ hessati gotamo.

22 Anāsavā vītarāgā,

santacittā samāhitā;

Kolito upatisso ca,

aggā hessanti sāvakā;

Ānando nāmupaṭṭhāko,

upaṭṭhissatimaṁ jinaṁ.

23 Khemā uppalavaṇṇā ca,

aggā hessanti sāvikā;

Anāsavā santacittā,

vītarāgā samāhitā;

Bodhi tassa bhagavato,

assatthoti pavuccati.

24 Citto hatthāḷavako ca,

aggā hessantupaṭṭhakā;

Nandamātā ca uttarā,

aggā hessantupaṭṭhikā’.

25 Idaṁ sutvāna vacanaṁ,

assamassa mahesino;

Āmoditā naramarū,

buddhabījaṁ kira ayaṁ.

26 Ukkuṭṭhisaddā pavattanti,

apphoṭenti hasanti ca;

Katañjalī namassanti,

dasasahassī sadevakā.

27 ‘Yadimassa lokanāthassa,

virajjhissāma sāsanaṁ;

Anāgatamhi addhāne,

hessāma sammukhā imaṁ.

28 Yathā manussā nadiṁ tarantā,

Paṭititthaṁ virajjhiya;

Heṭṭhā titthe gahetvāna,

Uttaranti mahānadiṁ.

29 Evamevaṁ mayaṁ sabbe,

yadi muñcāmimaṁ jinaṁ;

Anāgatamhi addhāne,

hessāma sammukhā imaṁ’.

30 Tassāpi vacanaṁ sutvā,

bhiyyo cittaṁ pasādayiṁ;

Uttariṁ vatamadhiṭṭhāsiṁ,

dasapāramipūriyā.

31 Evamahaṁ saṁsaritvā,

parivajjento anācaraṁ;

Dukkarañca kataṁ mayhaṁ,

bodhiyāyeva kāraṇā.

32 Nagaraṁ bārāṇasī nāma,

kikī nāmāsi khattiyo;

Vasate tattha nagare,

sambuddhassa mahākulaṁ.

33 Brāhmaṇo brahmadattova,

āsi buddhassa so pitā;

Dhanavatī nāma janikā,

kassapassa mahesino.

34 Duve vassasahassāni,

agāraṁ ajjha so vasi;

Haṁso yaso sirinando,

tayo pāsādamuttamā.

35 Tisoḷasasahassāni,

Nāriyo samalaṅkatā;

Sunandā nāma sā nārī,

Vijitaseno nāma atrajo.

36 Nimitte caturo disvā,

pāsādenābhinikkhami;

Sattāhaṁ padhānacāraṁ,

acarī purisuttamo.

37 Brahmunā yācito santo,

kassapo lokanāyako;

Vatti cakkaṁ mahāvīro,

migadāye naruttamo.

38 Tisso ca bhāradvājo ca,

ahesuṁ aggasāvakā;

Sabbamitto nāmupaṭṭhāko,

kassapassa mahesino.

39 Anuḷā uruvelā ca,

ahesuṁ aggasāvikā;

Bodhi tassa bhagavato,

nigrodhoti pavuccati.

40 Sumaṅgalo ghaṭikāro ca,

ahesuṁ aggupaṭṭhakā;

Vicitasenā bhaddā ca,

ahesuṁ aggupaṭṭhikā.

41 Uccattanena so buddho,

vīsatiratanuggato;

Vijjulaṭṭhīva ākāse,

candova gahapūrito.

42 Vīsativassasahassāni,

āyu tassa mahesino;

Tāvatā tiṭṭhamāno so,

tāresi janataṁ bahuṁ.

43 Dhammataḷākaṁ māpayitvā,

sīlaṁ datvā vilepanaṁ;

Dhammadussaṁ nivāsetvā,

dhammamālaṁ vibhajjiya.

44 Dhammavimalamādāsaṁ,

ṭhapayitvā mahājane;

Keci nibbānaṁ patthentā,

passantu me alaṅkaraṁ.

45 Sīlakañcukaṁ datvāna,

jhānakavacavammitaṁ;

Dhammacammaṁ pārupitvā,

datvā sannāhamuttamaṁ.

46 Satiphalakaṁ datvāna,

tikhiṇañāṇakuntimaṁ;

Dhammakhaggavaraṁ datvā,

sīlasaṁsaggamaddanaṁ.

47 Tevijjābhūsanaṁ datvāna,

āveḷaṁ caturo phale;

Chaḷabhiññābharaṇaṁ datvā,

dhammapupphapiḷandhanaṁ.

48 Saddhammapaṇḍaracchattaṁ,

datvā pāpanivāraṇaṁ;

Māpayitvābhayaṁ pupphaṁ,

nibbuto so sasāvako.

49 Eso hi sammāsambuddho,

appameyyo durāsado;

Eso hi dhammaratano,

svākkhāto ehipassiko.

50 Eso hi saṅgharatano,

suppaṭipanno anuttaro;

Sabbaṁ tamantarahitaṁ,

nanu rittā sabbasaṅkhārā.

51 Mahākassapo jino satthā,

Setabyārāmamhi nibbuto;

Tatthevassa jinathūpo,

Yojanubbedhamuggato”ti.

52 Kassapassa bhagavato vaṁso catuvīsatimo.