Petavatthu 35

Petavatthu

Cūḷavagga

10. Dhātuvivaṇṇapetavatthu

1 “Antalikkhasmiṁ tiṭṭhanto,

Duggandho pūti vāyasi;

Mukhañca te kimayo pūtigandhaṁ,

Khādanti kiṁ kammamakāsi pubbe.

2 Tato satthaṁ gahetvāna,

okkantanti punappunaṁ;

Khārena paripphositvā,

okkantanti punappunaṁ.

3 Kiṁ nu kāyena vācāya,

manasā dukkaṭaṁ kataṁ;

Kissa kammavipākena,

idaṁ dukkhaṁ nigacchasī”ti.

4 “Ahaṁ rājagahe ramme,

ramaṇīye giribbaje;

Issaro dhanadhaññassa,

supahūtassa mārisa.

5 Tassāyaṁ me bhariyā ca,

dhītā ca suṇisā ca me;

Tā mālaṁ uppalañcāpi,

paccagghañca vilepanaṁ;

Thūpaṁ harantiyo vāresiṁ,

taṁ pāpaṁ pakataṁ mayā.

6 Chaḷāsītisahassāni,

mayaṁ paccattavedanā;

Thūpapūjaṁ vivaṇṇetvā,

paccāma niraye bhusaṁ.

7 Ye ca kho thūpapūjāya,

vattante arahato mahe;

Ādīnavaṁ pakāsenti,

vivecayetha ne tato.

8 Imā ca passa āyantiyo,

Māladhārī alaṅkatā;

Mālāvipākaṁnubhontiyo,

Samiddhā ca tā yasassiniyo.

9 Tañca disvāna accheraṁ,

abbhutaṁ lomahaṁsanaṁ;

Namo karonti sappaññā,

vandanti taṁ mahāmuniṁ.

10 Sohaṁ nūna ito gantvā,

yoniṁ laddhāna mānusiṁ;

Thūpapūjaṁ karissāmi,

appamatto punappunan”ti.

11 Dhātuvivaṇṇapetavatthu dasamaṁ.

12 Cūḷavaggo tatiyo.

13 Tassuddānaṁ

14 Abhijjamāno kuṇḍiyo,

rathakārī bhusena ca;

Kumāro gaṇikā ceva,

dve luddā piṭṭhipūjanā;

Vaggo tena pavuccatīti.