Therāpadāna 495

Therāpadāna

Kiṅkaṇipupphavagga

Koraṇḍapupphiyattheraapadāna

1 “Vanakammiko pure āsiṁ,

pitumātumatenahaṁ;

Pasumārena jīvāmi,

kusalaṁ me na vijjati.

2 Mama āsayasāmantā,

tisso lokagganāyako;

Padāni tīṇi dassesi,

anukampāya cakkhumā.

3 Akkante ca pade disvā,

tissanāmassa satthuno;

Haṭṭho haṭṭhena cittena,

pade cittaṁ pasādayiṁ.

4 Koraṇḍaṁ pupphitaṁ disvā,

pādapaṁ dharaṇīruhaṁ;

Sakosakaṁ gahetvāna,

padaseṭṭhamapūjayiṁ.

5 Tena kammena sukatena,

cetanāpaṇidhīhi ca;

Jahitvā mānusaṁ dehaṁ,

tāvatiṁsamagacchahaṁ.

6 Yaṁ yaṁ yonupapajjāmi,

devattaṁ atha mānusaṁ;

Koraṇḍakachavi homi,

suppabhāso bhavāmahaṁ.

7 Dvenavute ito kappe,

yaṁ kammamakariṁ tadā;

Duggatiṁ nābhijānāmi,

padapūjāyidaṁ phalaṁ.

8 Kilesā jhāpitā mayhaṁ,

…pe…

viharāmi anāsavo.

9 Svāgataṁ vata me āsi,

…pe…

kataṁ buddhassa sāsanaṁ.

10 Paṭisambhidā catasso,

…pe…

kataṁ buddhassa sāsanaṁ”.

11 Itthaṁ sudaṁ āyasmā koraṇḍapupphiyo thero imā gāthāyo abhāsitthāti.

12 Koraṇḍapupphiyattherassāpadānaṁ tatiyaṁ.