Therāpadāna 493

Therāpadāna

Kiṅkaṇipupphavagga

Tikiṅkaṇipupphiyattheraapadāna

1 “Kaṇikāraṁva jotantaṁ,

nisinnaṁ pabbatantare;

Addasaṁ virajaṁ buddhaṁ,

vipassiṁ lokanāyakaṁ.

2 Tīṇi kiṅkaṇipupphāni,

paggayha abhiropayiṁ;

Sambuddhamabhipūjetvā,

gacchāmi dakkhiṇāmukho.

3 Tena kammena sukatena,

cetanāpaṇidhīhi ca;

Jahitvā mānusaṁ dehaṁ,

tāvatiṁsamagacchahaṁ.

4 Ekanavutito kappe,

yaṁ buddhamabhipūjayiṁ;

Duggatiṁ nābhijānāmi,

buddhapūjāyidaṁ phalaṁ.

5 Kilesā jhāpitā mayhaṁ,

bhavā sabbe samūhatā;

Nāgova bandhanaṁ chetvā,

viharāmi anāsavo.

6 Svāgataṁ vata me āsi,

mama buddhassa santike;

Tisso vijjā anuppattā,

kataṁ buddhassa sāsanaṁ.

7 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

8 Itthaṁ sudaṁ āyasmā tikiṅkaṇipupphiyo thero imā gāthāyo abhāsitthāti.

9 Tikiṅkaṇipupphiyattherassāpadānaṁ paṭhamaṁ.