Tipiṭaka
Milindapañha 14
Змінити переклад
Milindapañha
Mahāvagga
12. Vīriyalakkhaṇapañha
1 Rājā āha—“bhante nāgasena, kiṁlakkhaṇaṁ vīriyan”ti? “Upatthambhanalakkhaṇaṁ, mahārāja, vīriyaṁ, vīriyūpatthambhitā sabbe kusalā dhammā na parihāyantī”ti.
2 “Opammaṁ karohī”ti. “Yathā, mahārāja, puriso gehe patante aññena dārunā upatthambheyya, upatthambhitaṁ santaṁ evaṁ taṁ gehaṁ na pateyya; evameva kho, mahārāja, upatthambhanalakkhaṇaṁ vīriyaṁ, vīriyūpatthambhitā sabbe kusalā dhammā na parihāyantī”ti.
3 “Bhiyyo opammaṁ karohī”ti. “Yathā, mahārāja, parittakaṁ senaṁ mahatī senā bhañjeyya, tato rājā aññamaññaṁ anussāreyya anupeseyya attano parittakāya senāya balaṁ anupadaṁ dadeyya, tāya saddhiṁ parittakā senā mahatiṁ senaṁ bhañjeyya; evameva kho, mahārāja, upatthambhanalakkhaṇaṁ vīriyaṁ, vīriyūpatthambhitā sabbe kusalā dhammā na parihāyanti. Bhāsitampetaṁ, mahārāja, bhagavatā—‘vīriyavā kho, bhikkhave, ariyasāvako akusalaṁ pajahati, kusalaṁ bhāveti. Sāvajjaṁ pajahati, anavajjaṁ bhāveti. Suddhamattānaṁ pariharatī’”ti.
4 “Kallosi, bhante nāgasenā”ti.
5 Vīriyalakkhaṇapañho dvādasamo.