Milindapañha 207

Milindapañha

Opammakathāpañha

Pathavīvagga

7. Candaṅgapañha

1 “Bhante nāgasena, ‘candassa pañca aṅgāni gahetabbānī’ti yaṁ vadesi, katamāni tāni pañca aṅgāni gahetabbānī”ti? “Yathā, mahārāja, cando sukkapakkhe udayanto uttaruttariṁ vaḍḍhati; evameva kho, mahārāja, yoginā yogāvacarena ācārasīlaguṇavattappaṭipattiyā āgamādhigame paṭisallāne satipaṭṭhāne indriyesu guttadvāratāya bhojane mattaññutāya jāgariyānuyoge uttaruttariṁ vaḍḍhitabbaṁ. Idaṁ, mahārāja, candassa paṭhamaṁ aṅgaṁ gahetabbaṁ.

2 Puna caparaṁ, mahārāja, cando uḷārādhipati; evameva kho, mahārāja, yoginā yogāvacarena uḷārena chandādhipatinā bhavitabbaṁ. Idaṁ, mahārāja, candassa dutiyaṁ aṅgaṁ gahetabbaṁ.

3 Puna caparaṁ, mahārāja, cando nisāya carati; evameva kho, mahārāja, yoginā yogāvacarena pavivittena bhavitabbaṁ. Idaṁ, mahārāja, candassa tatiyaṁ aṅgaṁ gahetabbaṁ.

4 Puna caparaṁ, mahārāja, cando vimānaketu; evameva kho, mahārāja, yoginā yogāvacarena sīlaketunā bhavitabbaṁ. Idaṁ, mahārāja, candassa catutthaṁ aṅgaṁ gahetabbaṁ.

5 Puna caparaṁ, mahārāja, cando āyācitapatthito udeti; evameva kho, mahārāja, yoginā yogāvacarena āyācitapatthitena kulāni upasaṅkamitabbāni. Idaṁ, mahārāja, candassa pañcamaṁ aṅgaṁ gahetabbaṁ. Bhāsitampetaṁ, mahārāja, bhagavatā devātidevena saṁyuttanikāyavare ‘candūpamā, bhikkhave, kulāni upasaṅkamatha, apakasseva kāyaṁ apakassa cittaṁ niccanavakā kulesu appagabbhā’”ti.

6 Candaṅgapañho sattamo.