Therāpadāna 383

Therāpadāna

Avaṭaphalavagga

1 Avaṭaphaladāyakattheraapadāna

1 “Sataraṁsi nāma bhagavā,

sayambhū aparājito;

Vivekakāmo sambuddho,

gocarāyābhinikkhami.

2 Phalahattho ahaṁ disvā,

upagacchiṁ narāsabhaṁ;

Pasannacitto sumano,

avaṭaṁ adadiṁ phalaṁ.

3 Catunnavutito kappe,

yaṁ phalamadadiṁ ahaṁ;

Duggatiṁ nābhijānāmi,

phaladānassidaṁ phalaṁ.

4 Kilesā jhāpitā mayhaṁ,

bhavā sabbe samūhatā;

Nāgova bandhanaṁ chetvā,

viharāmi anāsavo.

5 Svāgataṁ vata me āsi,

mama buddhassa santike;

Tisso vijjā anuppattā,

kataṁ buddhassa sāsanaṁ.

6 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

7 Itthaṁ sudaṁ āyasmā avaṭaphaladāyako thero imā gāthāyo abhāsitthāti.

8 Avaṭaphaladāyakattherassāpadānaṁ paṭhamaṁ.