Tipiṭaka

Kathāvatthu 127

Vertaling wijzigen

Kathāvatthu

Mahāpaṇṇāsaka

Terasamavagga

Anantarāpayuttakathā

1 Anantarāpayutto puggalo sammattaniyāmaṁ okkameyyāti? Āmantā. Micchattaniyāmañca sammattaniyāmañca ubho okkameyyāti? Na hevaṁ vattabbe …pe…

2 Anantarāpayutto puggalo sammattaniyāmaṁ okkameyyāti? Āmantā. Nanu taṁ kammaṁ payuttaṁ kukkuccaṁ uppāditaṁ vippaṭisāriyaṁ janitanti? Āmantā. Hañci taṁ kammaṁ payuttaṁ kukkuccaṁ uppāditaṁ vippaṭisāriyaṁ janitaṁ, no ca vata re vattabbe—“anantarāpayutto puggalo sammattaniyāmaṁ okkameyyā”ti.

3 Anantarāpayutto puggalo abhabbo sammattaniyāmaṁ okkamitunti? Āmantā. Mātā jīvitā voropitā … pitā jīvitā voropito … arahā jīvitā voropito … duṭṭhena cittena tathāgatassa lohitaṁ uppāditaṁ … saṅgho bhinnoti? Na hevaṁ vattabbe …pe….

4 Anantarāpayutto puggalo taṁ kammaṁ paṭisaṁharitvā kukkuccaṁ paṭivinodetvā vippaṭisāriyaṁ paṭivinetvā abhabbo sammattaniyāmaṁ okkamitunti? Āmantā. Mātā jīvitā voropitā … pitā jīvitā voropito …pe… saṅgho bhinnoti? Na hevaṁ vattabbe …pe….

5 Anantarāpayutto puggalo taṁ kammaṁ paṭisaṁharitvā kukkuccaṁ paṭivinodetvā vippaṭisāriyaṁ paṭivinetvā abhabbo sammattaniyāmaṁ okkamitunti? Āmantā. Nanu taṁ kammaṁ paṭisaṁhaṭaṁ kukkuccaṁ paṭivinoditaṁ vippaṭisāriyaṁ paṭivinītanti? Āmantā. Hañci taṁ kammaṁ paṭisaṁhaṭaṁ kukkuccaṁ paṭivinoditaṁ vippaṭisāriyaṁ paṭivinītaṁ, no ca vata re vattabbe—“anantarāpayutto puggalo taṁ kammaṁ paṭisaṁharitvā kukkuccaṁ paṭivinodetvā vippaṭisāriyaṁ paṭivinetvā abhabbo sammattaniyāmaṁ okkamitun”ti.

6 Anantarāpayutto puggalo sammattaniyāmaṁ okkameyyāti? Āmantā. Nanu taṁ kammaṁ payutto āsīti? Āmantā. Hañci taṁ kammaṁ payutto āsi, no ca vata re vattabbe—“anantarāpayutto puggalo sammattaniyāmaṁ okkameyyā”ti.

Anantarāpayuttakathā niṭṭhitā.

Mahāsaṅgīti Tipiṭaka (Pāli), 2005. Public Domain Mark 1.0. Mahāsaṅgīti Tipiṭaka Buddhavasse 2500, World Tipiṭaka Edition in Roman Script, B.E. 2548 (2005), prepared by the M.L. Maniratana Bunnag Dhamma Society Fund. Text and segmenting as published by SuttaCentral, which marks it free of known restrictions under copyright law. Versie: bilara-data, published branch at 4b0b8739c (2026-11-05). Bron

Pali Canon of Theravāda Buddhism, Mahāsaṅgīti edition.

De voorwaarden van deze bron:

  • We respectfully request that it is used in accordance with the values of the Buddhist tradition.
  • SuttaCentral's second record for this edition adds: please do not use this work in AI training datasets, for the development of any AI model or algorithm, or in any AI-derived technologies.

Getoond om te lezen en te bestuderen, op basis van de hier genoemde bronnen. EveryApp certificeert geen enkele tekst: controleer voor alles wat ertoe doet een gedrukte editie of vraag het een leraar van de traditie.

Een fout in de tekst meldenEen zorg over rechten melden