Therāpadāna 18

Vertaling wijzigen

Therāpadāna

Sīhāsaniyavagga

Rāhulattheraapadāna

1 “Padumuttarassa bhagavato,

Lokajeṭṭhassa tādino;

Sattabhūmamhi pāsāde,

Ādāsaṁ santhariṁ ahaṁ.

2 Khīṇāsavasahassehi,

parikiṇṇo mahāmuni;

Upāgami gandhakuṭiṁ,

dvipadindo narāsabho.

3 Virocento gandhakuṭiṁ,

devadevo narāsabho;

Bhikkhusaṅghe ṭhito satthā,

imā gāthā abhāsatha.

4 ‘Yenāyaṁ jotitā seyyā,

ādāsova susanthato;

Tamahaṁ kittayissāmi,

suṇātha mama bhāsato.

5 Soṇṇamayā rūpimayā,

atho veḷuriyāmayā;

Nibbattissanti pāsādā,

ye keci manaso piyā.

6 Catusaṭṭhikkhattuṁ devindo,

devarajjaṁ karissati;

Sahassakkhattuṁ cakkavattī,

bhavissati anantarā.

7 Ekavīsatikappamhi,

vimalo nāma khattiyo;

Cāturanto vijitāvī,

cakkavattī bhavissati.

8 Nagaraṁ reṇuvatī nāma,

iṭṭhakāhi sumāpitaṁ;

Āyāmato tīṇi sataṁ,

caturassasamāyutaṁ.

9 Sudassano nāma pāsādo,

vissakammena māpito;

Kūṭāgāravarūpeto,

sattaratanabhūsito.

10 Dasasaddāvivittaṁ taṁ,

vijjādharasamākulaṁ;

Sudassanaṁva nagaraṁ,

devatānaṁ bhavissati.

11 Pabhā niggacchate tassa,

uggacchanteva sūriye;

Virocessati taṁ niccaṁ,

samantā aṭṭhayojanaṁ.

12 Kappasatasahassamhi,

okkākakulasambhavo;

Gotamo nāma gottena,

satthā loke bhavissati.

13 Tusitā so cavitvāna,

sukkamūlena codito;

Gotamassa bhagavato,

atrajo so bhavissati.

14 Sacevaseyya agāraṁ,

cakkavattī bhaveyya so;

Aṭṭhānametaṁ yaṁ tādī,

agāre ratimajjhagā.

15 Nikkhamitvā agāramhā,

pabbajissati subbato;

Rāhulo nāma nāmena,

arahā so bhavissati’.

16 Kikīva aṇḍaṁ rakkheyya,

cāmarī viya vāladhiṁ;

Nipako sīlasampanno,

evaṁ rakkhiṁ mahāmuni.

17 Tassāhaṁ dhammamaññāya,

vihāsiṁ sāsane rato;

Sabbāsave pariññāya,

viharāmi anāsavo.

18 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

19 Itthaṁ sudaṁ āyasmā rāhulo thero imā gāthāyo abhāsitthāti.

20 Rāhulattherassāpadānaṁ chaṭṭhaṁ.