Therāpadāna 195

Therāpadāna

Tamālapupphiyavagga

Khaṇḍaphulliyattheraapadāna

1 “Phussassa kho bhagavato,

thūpo āsi mahāvane;

Kuñjarehi tadā bhinno,

parūḷho pādapo tahiṁ.

2 Visamañca samaṁ katvā,

sudhāpiṇḍaṁ adāsahaṁ;

Tilokagaruno tassa,

guṇehi paritosito.

3 Dvenavute ito kappe,

yaṁ kammamakariṁ tadā;

Duggatiṁ nābhijānāmi,

sudhāpiṇḍassidaṁ phalaṁ.

4 Sattasattatikappamhi,

jitasenāsuṁ soḷasa;

Sattaratanasampannā,

cakkavattī mahabbalā.

5 Paṭisambhidā catasso,

…pe…

kataṁ buddhassa sāsanaṁ”.

6 Itthaṁ sudaṁ āyasmā khaṇḍaphulliyo thero imā gāthāyo abhāsitthāti.

7 Khaṇḍaphulliyattherassāpadānaṁ tatiyaṁ.