Therāpadāna 223

Therāpadāna

Ālambaṇadāyakavagga

1 Ālambaṇadāyakattheraapadāna

1 “Atthadassissa bhagavato,

lokajeṭṭhassa tādino;

Ālambaṇaṁ mayā dinnaṁ,

dvipadindassa tādino.

2 Dharaṇiṁ paṭipajjāmi,

vipulaṁ sāgarapparaṁ;

Pāṇesu ca issariyaṁ,

vattemi vasudhāya ca.

3 Kilesā jhāpitā mayhaṁ,

bhavā sabbe samūhatā;

Tisso vijjā anuppattā,

kataṁ buddhassa sāsanaṁ.

4 Ito dvesaṭṭhikappamhi,

tayo āsiṁsu khattiyā;

Ekāpassitanāmā te,

cakkavattī mahabbalā.

5 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṁ buddhassa sāsanaṁ”.

6 Itthaṁ sudaṁ āyasmā ālambaṇadāyako thero imā gāthāyo abhāsitthāti.

7 Ālambaṇadāyakattherassāpadānaṁ paṭhamaṁ.