Dhātukathā 8

Dhātukathā

2 Niddesa

2.3. Tatiyanaya Asaṅgahitenasaṅgahitapadaniddesa

1 Vedanākkhandhena ye dhammā … saññākkhandhena ye dhammā … saṅkhārakkhandhena ye dhammā … samudayasaccena ye dhammā … maggasaccena ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā, te dhammā katihi khandhehi katihāyatanehi katihi dhātūhi saṅgahitā? Te dhammā asaṅkhataṁ khandhato ṭhapetvā tīhi khandhehi ekenāyatanena ekāya dhātuyā saṅgahitā.

2 Nirodhasaccena ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā …pe… te dhammā catūhi khandhehi ekenāyatanena ekāya dhātuyā saṅgahitā.

3 Jīvitindriyena ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā …pe… te dhammā asaṅkhataṁ khandhato ṭhapetvā dvīhi khandhehi ekenāyatanena ekāya dhātuyā saṅgahitā.

4 Itthindriyena ye dhammā … purisindriyena ye dhammā … sukhindriyena ye dhammā … dukkhindriyena ye dhammā … somanassindriyena ye dhammā … domanassindriyena ye dhammā … upekkhindriyena ye dhammā … saddhindriyena ye dhammā … vīriyindriyena ye dhammā … satindriyena ye dhammā … samādhindriyena ye dhammā … paññindriyena ye dhammā … anaññātaññassāmītindriyena ye dhammā … aññindriyena ye dhammā … aññātāvindriyena ye dhammā … avijjāya ye dhammā … avijjāpaccayā saṅkhārena ye dhammā … saḷāyatanapaccayā phassena ye dhammā … phassapaccayā vedanāya ye dhammā … vedanāpaccayā taṇhāya ye dhammā … taṇhāpaccayā upādānena ye dhammā … (…) kammabhavena ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā …pe… te dhammā asaṅkhataṁ khandhato ṭhapetvā tīhi khandhehi ekenāyatanena ekāya dhātuyā saṅgahitā.

5 Jātiyā ye dhammā … jarāya ye dhammā … maraṇena ye dhammā … jhānena ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā …pe… te dhammā asaṅkhataṁ khandhato ṭhapetvā dvīhi khandhehi ekenāyatanena ekāya dhātuyā saṅgahitā.

6 Sokena ye dhammā … dukkhena ye dhammā … domanassena ye dhammā … upāyāsena ye dhammā … satipaṭṭhānena ye dhammā … sammappadhānena ye dhammā … appamaññāya ye dhammā … pañcahi indriyehi ye dhammā … pañcahi balehi ye dhammā … sattahi bojjhaṅgehi ye dhammā … ariyena aṭṭhaṅgikena maggena ye dhammā … phassena ye dhammā … vedanāya ye dhammā … saññāya ye dhammā … cetanāya ye dhammā … adhimokkhena ye dhammā … manasikārena ye dhammā … hetūhi dhammehi ye dhammā … hetūhi ceva sahetukehi ca dhammehi ye dhammā … hetūhi ceva hetusampayuttehi ca dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā …pe… te dhammā asaṅkhataṁ khandhato ṭhapetvā tīhi khandhehi ekenāyatanena ekāya dhātuyā saṅgahitā.

7 Appaccayehi dhammehi ye dhammā … asaṅkhatehi dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā …pe… te dhammā catūhi khandhehi ekenāyatanena ekāya dhātuyā saṅgahitā.

8 Āsavehi dhammehi ye dhammā … āsavehi ceva sāsavehi ca dhammehi ye dhammā … āsavehi ceva āsavasampayuttehi ca dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā … te dhammā asaṅkhataṁ khandhato ṭhapetvā tīhi khandhehi ekenāyatanena ekāya dhātuyā saṅgahitā.

9 Saṁyojanehi … ganthehi … oghehi … yogehi … nīvaraṇehi … parāmāsehi dhammehi ye dhammā … parāmāsehi ceva parāmaṭṭhehi ca dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā … te dhammā asaṅkhataṁ khandhato ṭhapetvā tīhi khandhehi ekenāyatanena ekāya dhātuyā saṅgahitā.

10 Cetasikehi dhammehi ye dhammā … cittasampayuttehi dhammehi ye dhammā … cittasaṁsaṭṭhehi dhammehi ye dhammā … cittasaṁsaṭṭhasamuṭṭhānehi dhammehi ye dhammā … cittasaṁsaṭṭhasamuṭṭhānasahabhūhi dhammehi ye dhammā … cittasaṁsaṭṭhasamuṭṭhānānuparivattīhi dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā …pe… te dhammā asaṅkhataṁ khandhato ṭhapetvā ekena khandhena ekenāyatanena ekāya dhātuyā saṅgahitā.

11 Cittasahabhūhi dhammehi ye dhammā … cittānuparivattīhi dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā …pe… te dhammā na kehici khandhehi ekenāyatanena ekāya dhātuyā saṅgahitā.

12 Upādānehi dhammehi ye dhammā … kilesehi dhammehi ye dhammā … kilesehi ceva saṅkilesikehi ca dhammehi ye dhammā … kilesehi ceva saṅkiliṭṭhehi ca dhammehi ye dhammā … kilesehi ceva kilesasampayuttehi ca dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā, te dhammā katihi khandhehi katihāyatanehi katihi dhātūhi saṅgahitā? Te dhammā asaṅkhataṁ khandhato ṭhapetvā tīhi khandhehi ekenāyatanena ekāya dhātuyā saṅgahitā.

13 Tayo khandhā tathā saccā,

indriyāni ca soḷasa;

Padāni paccayākāre,

cuddasūpari cuddasa.

14 Samatiṁsa padā honti,

gocchakesu dasasvatha;

Duve cūḷantaradukā,

aṭṭha honti mahantarāti. [90]

15 Asaṅgahitena saṅgahitapadaniddeso tatiyo.