Jātaka 267

Jātaka

Tikanipāta

Padumavagga

7. Kakkaṭakajātaka

1 “Siṅgīmigo āyatacakkhunetto,

Aṭṭhittaco vārisayo alomo;

Tenābhibhūto kapaṇaṁ rudāmi,

Mā heva maṁ pāṇasamaṁ jaheyya”.

2 “Ayya na taṁ jahissāmi,

kuñjaraṁ saṭṭhihāyanaṁ;

Pathabyā cāturantāya,

suppiyo hosi me tuvaṁ”.

3 “Ye kuḷīrā samuddasmiṁ,

gaṅgāya yamunāya ca;

Tesaṁ tvaṁ vārijo seṭṭho,

muñca rodantiyā patin”ti.

4 Kakkaṭakajātakaṁ sattamaṁ.