Jātaka 339

Jātaka

Catukkanipāta

Kokilavagga

9. Bāverujātaka

1 “Adassanena morassa,

sikhino mañjubhāṇino;

Kākaṁ tattha apūjesuṁ,

maṁsena ca phalena ca.

2 Yadā ca sarasampanno,

moro bāverumāgamā;

Atha lābho ca sakkāro,

vāyasassa ahāyatha.

3 Yāva nuppajjatī buddho,

dhammarājā pabhaṅkaro;

Tāva aññe apūjesuṁ,

puthū samaṇabrāhmaṇe.

4 Yadā ca sarasampanno,

buddho dhammaṁ adesayi;

Atha lābho ca sakkāro,

titthiyānaṁ ahāyathā”ti.

5 Bāverujātakaṁ navamaṁ.