Milindapañha 246

Milindapañha

Opammakathāpañha

Kumbhavagga

6. Bhojanaṅgapañha

1 “Bhante nāgasena, ‘bhojanassa tīṇi aṅgāni gahetabbānī’ti yaṁ vadesi, katamāni tāni tīṇi aṅgāni gahetabbānī”ti? “Yathā, mahārāja, bhojanaṁ sabbasattānaṁ upatthambho; evameva kho, mahārāja, yoginā yogāvacarena sabbasattānaṁ maggupatthambhena bhavitabbaṁ. Idaṁ, mahārāja, bhojanassa paṭhamaṁ aṅgaṁ gahetabbaṁ.

2 Puna caparaṁ, mahārāja, bhojanaṁ sabbasattānaṁ balaṁ vaḍḍheti; evameva kho, mahārāja, yoginā yogāvacarena puññavaḍḍhiyā vaḍḍhitabbaṁ. Idaṁ, mahārāja, bhojanassa dutiyaṁ aṅgaṁ gahetabbaṁ.

3 Puna caparaṁ, mahārāja, bhojanaṁ sabbasattānaṁ abhipatthitaṁ; evameva kho, mahārāja, yoginā yogāvacarena sabbalokābhipatthitena bhavitabbaṁ. Idaṁ, mahārāja, bhojanassa tatiyaṁ aṅgaṁ gahetabbaṁ. Bhāsitampetaṁ, mahārāja, therena mahāmoggallānena—

4 ‘Saṁyamena niyamena,

sīlena paṭipattiyā;

Patthitena bhavitabbaṁ,

sabbalokassa yoginā’”ti.

5 Bhojanaṅgapañho chaṭṭho.