Therāpadāna 141

Therāpadāna

Sobhitavagga

9 Sālapupphadāyakattheraapadāna

1 “Migarājā tadā āsiṁ,

abhijāto sukesarī;

Giriduggaṁ gavesanto,

addasaṁ lokanāyakaṁ.

2 Ayaṁ nu kho mahāvīro,

nibbāpeti mahājanaṁ;

Yannūnāhaṁ upāseyyaṁ,

devadevaṁ narāsabhaṁ.

3 Sākhaṁ sālassa bhañjitvā,

sakosaṁ pupphamāhariṁ;

Upagantvāna sambuddhaṁ,

adāsiṁ pupphamuttamaṁ.

4 Ekanavutito kappe,

yaṁ pupphamabhiropayiṁ;

Duggatiṁ nābhijānāmi,

pupphadānassidaṁ phalaṁ.

5 Ito ca navame kappe,

virocanasanāmakā;

Tayo āsiṁsu rājāno,

cakkavattī mahabbalā.

6 Paṭisambhidā catasso,

…pe…

kataṁ buddhassa sāsanaṁ”.

7 Itthaṁ sudaṁ āyasmā sālapupphadāyako thero imā gāthāyo abhāsitthāti.

8 Sālapupphadāyakattherassāpadānaṁ navamaṁ.